Bol-anon miilog sa bakus sa Hapon

CEBU, Philippines — Dili lang bakus maoy giilog, ang Bol-anong fighter  nga si 105-pounder Jake “El Bambino” Amparo (14-4-1, 3 KO'S) mao puy unang nakapatagamtam og kapildihan ni world-ranked Goki Kobayashi (6-1, 4 KO's) niadtong adlaw nga Sabado didto sa Kobe, Japan. Sa unang round palang, gipalukapa dayon ni Amparo si Kobayashi, mao na kadto ang naghatag og senyales sa Pinoy aron makmakon ang Hapon sa misunod nga mga round.

Nailog ni Amparo ang WBO Asia Pacific Minimumweight belt ug gipaabot nga mamahimo na unya kining dalan para maapil siya sa gikaintapang world rankings  sanglit si Kobayashi  maoy ranked #4 sa WBO. Ang tanang hurado nakombinsir sa 25-anyos nga lumad sa Guindulman, Bohol sa iskor nga 117-109, ug ang laing duha parehong miiskor og 114-112 pabor tanan kaniya.

Ang kadaugan ni Amparo magsilbing bawos para sa mga kababayan niyang sila si Cris Ganoza, Marco John Rementizo ug Roslan Eco nga gipangkulata ni Kobayashi.— /IBM