Gilas Pilipinas Girls milubong sa Maldives og 122 puntos

CEBU, Philippines — Walay kaluoy nga gilat-an sa Gilas Pilipinas Girls ang Maldives team human nila kini gitambakan og 122 puntos sa 144-22 nilang kadaugan aron magpabiling walay pildi sa nagpadayong 2023 FIBA U16 Women's Asian Championship Division B niadtong Martes sa gabii nga giduwa didto sa  Amman, Jordan.

Ikaduha na nila kining dakong kadaugan human ilang gilubong og 39 puntos ang koponan sa Hong Kong sa una nilang duwa niadtong Lunes sa gabii.

Ang 10 sa 12 ka players sa mga dalagitang Gilas squad naka double-digit nga gipangulohan sa 21 puntos ni Sophia Anne Canindo nga gipakapinan og unom ka assists, upat ka rebounds, ug duha ka steals.

Samtang silang Ma. Christina Aubrey Lapasaran ug Nevaeh Smith miamot sab og  16 kada usa,  si Ariel Star De La nakahimo og double-double, 10 puntos ug 12 rebounds uban sa upat ka assists.

Ang Gilas Girls karon maoy nanguna sa Group A sa ilang  2-0 nga baraha, karong adlawa ilang makaatubang ang host Jordan.— IBM