NM Rommel Ganzon naghari sa CEPCA Summer Open chessfest
CEBU, Philippines — Si National Master Rommel Ganzon maoy milugwa nga kampiyon sa Cebu Executives and Professionals Chess Association (CEPCA) Summer Open Chess Tournament niadtong weekend didto sa Robinsons Galleria Cebu.
Gikumpleto ni Ganzon ang pito ka hugna nga kompetisyon uban ang labing taas nga 6.5 puntos aron angkonon ang P5,000 nga premyo.
Siyam sa 165 ka mga partisipante ang parehong mitali og 6.0 puntos apan si Allan Pason ang mipahiluna sa ikaduhang dapit kortesiya sa mas taas niyang tiebreaker. Mibulsa siyta og P3,000.
Sila si International Master Joel Pimentel, Khent Darylle Delig, ug Richard Natividad ang miokupar sa ikatulo ngadto sa ikalimang puwesto.
Naglangkob sa top 10 mao sila si Aller Somosot, Diego Abraham Caparino, NM Rogelio Enriquez Jr., Mario Mangubat, ug Venancio Loyola Jr.
Sa laing bahin, si CEPCA president Engr. Jerry Maratas nga maoy nagorganisa sa tinuig nga torneyo isip kabahin sa selebrasyon sa adlaw niyang natawhan nadoble ang kalipay gumikan kay ang anak niyang si Jecole maoy gibayaw nga top player sa boys Under 14 age group. Nagsunod ni Jecole sila si Jelleone Alsola ug Gian Carlo Catadman.
Sa girls U14, ang top 3 finishers mao sila si Apple Rubin, Grejah Tuñacao, ug Glydel Rodrigo.
Ang ubang special awardees mao sila si NM Rogelio Enriquez Jr., Venancio Loyola ug NM Arnolito Cadiz (top Cepcans A), Jonathan Canque, Leo Cortes, ug Edwin Bacaron (top Cepcans B), Edelyn Vosotros (top female), ug Aller Somosot (top senior).
- Latest
