Fil-Am coach Erik Spoelstra kasama sa US coaching staff

MANILA, Philippines — Magkakaroon ng representasyon ang Pilipinas sa 2024 Olympic Games men’s basketball tournament na idaraos sa Paris, France.

Ito ay matapos mapasama si Filipino-American mentor Erik Spoelstra ng Miami Heat sa coaching staff ng US men’s basketball team para sa Paris Games.

Isa si Spoelstra sa tatlong assistant coaches ng team kasama sina Gonzaga coach Mark Few at Phoenix Suns coach Monty Williams base sa anunsiyo ng USA Basketball — ang national basketball association ng Amerika.

Magsisilbi namang head coach si Golden State Warriors coach Steve Kerr kung saan papalitan nito si dating head coach Gregg Popovich.

Makakabalik din sa Pilipinas si Spoelstra dahil makakasama rin ito ng US basketball team sa pagsabak sa prestihiyosong FIBA World Cup na iho-host ng Pilipinas, Japan at Indonesia sa 2023.

Masaya si Kerr na makasama si Spoelstra sa coaching staff dahil sa husay nito sa paggabay sa kanyang mga players sa Miami Heat.

Hanga rin si Kerr sa dedikasyon ni Spoelstra kaya’t malaki ang maitutulong ng Fil-Am mentor sa kanilang koponan.

“I like how hard Miami plays every year regardless of the circumstances. Erik’s teams always play hard, gets better as the season goes on, as they figure out roles. He’s a great coach and somebody I’ve always admired,” ani Kerr.