National fencing team sasalang sa OQT

MANILA, Philippines — Pagkakataon naman ng national fencing team na subukang humirit ng tiket para sa 2024 Paris Olympics.

Hahataw ang mga Pinoy fencers sa Asian Olympic Qualifying Tournament (OQT) na idaraos sa Abril 27 hanggang 28 sa Fujairah, United Arab Emirates.

Babanderahan ang PInoy squad ni Southeast Asian Games champion Samantha Catantan sa women’s di­vision at aariba naman sa men’s side si Noelito Jose.

Kasama ng dalawa sina Nathaniel Perez at Hanniel Abella,.

Kamakailan lamang ay tumapos si Catantan sa ika-10 puwesto sa US NCAA Fencing Championship.

Target ni Catantan na makaresbak sa pagkakataong ito matapos kapusin sa Olympic qualifying tournament para sa 2021 Tokyo Olympics.

Nakapasok ito sa women’s foil semifinals sa Asian OQT na ginanap sa Tashkent subalit natalo ito kay Yana Alborova ng Uzbekistan sa iskor na 10-15.

Kaya naman nais ni Catantan na makabawi at maisakatuparan ang pangarap na makapasok sa Olympics.

Galing si Catantan sa rehabilistasyon matapos mag­tamo ng ACL Anterior Cruciate Ligament sa semis ng 2023 SEA Games sa Cambodia.

“Her training, exposure at Penn State University is very helpful, and it shows in her performances. We at the PSC supported Sam and Noel,” wika ni PSC Commissioner Walter Torres.