Wizards buhi pa

CEBU, Philippines — Sila si Russell Westbrook ug Bradley Beal nagmangtas sa dihang ang Washington Wizards naka-angkon og laing kinabuhi human gipatikyaob ang Philadelphia 76ers, 122-114, sa Game 4 sa ilang best-of-seven NBA Eastern Conference playoff series kagahapon didto sa Capital One Arena sa Washington.

Si Westbrook mitapos uban ang 19 puntos, 21 ka rebounds, ug 14 ka assists alang sa ika-12 niyang triple-double sa playoffs, samtang si Beal mikadlit og 27 puntos alang sa Wizards nga nakalikay ma-sweep sa ikaupat nga sunod-sunod nga higayon.

Napiangan hinoon ang Sixers sa maong duwa gumikan kay ang ilang alas nga si Joel Embiid na-angol ang tuhod sa unang kuwarter ug mihimo lamang og otso puntos. 

Ang Sixers mao pa hinoon gihapon ang naglabaw sa serye, 3-1, ug mosuway pagtagak og usab sa Wizards sa Game 5 karong Huybes didto sa ilang korte.

Didto sa Memphis, si Donovan Mitchell mipatuasik og 30 puntos sa dihang gipalurop na sab sa Utah Jazz ang Grizzlies, 120-113, aron pagposte og 3-1 nga labaw sa ilang West playoff series. Milugwa nga bida sa Jazz mao si Rudy Gobert nga mibubo og 13 sa iyang 17 puntos sa ikatulong kuwarter ug ingon man si Fil-Am Jordan Clarkson nga mibugwak og 24 puntos. Wala sab magpa-alkansi sila si Bojan Bogdanovic ug Mike Conley nga nagkumboya og 24 puntos alang sa Jazz.