Phoenix mibihag sa Meralco alang sa unang daog

CEBU, Philippines — Ang Phoenix Super LPG Fuel Masters mipakurat sa defending champion Meralco Bolts, 109-97, alang sa una nilang daog sa PBA Philippine Cup niadtong Dominggo didto sa Ninoy Aquino Stadium sa kaulohan.

Si Jason Perkins mipakita nga nakarekober na siya sa trangkaso nga maoy hinungdan nganong nakapalta siya sa nag-una nilang duha ka duwa pinaagi sa pagpupo og 19 puntos ug lima ka rebounds sud lamang sa 28 minutos. Wala sab magpabitin si Tyler Tio nga mikadlit og 22 puntos ingon man si Ricci Rivero nga mipabuhagay og career-high 20 puntos, 14 niini iyang gibubo sa unang kuwarter.

Sila si Chris Newsome ug Bong Quinto nagkumbinar og 35 puntos samtang si Raymar Jose midugang og 12 puntos ug career-high 17 ka rebounds apan nangahoyhoy ang ilang abaga gumikan kay ang Meralco naparot sa ikaduhang sunod-sunod nga higayon sa tulo ka duwa. Sa laing bahin, ang Converge FiberXers milampaso sa Blackwater Bossing, 111-80, aron tablahon ang ilang baraha ngadto sa 2-2.

Sila si Justin Arana, Schonny Winston ug Justine Baltazar maoy nangu sa FiberXers, nga mikulata sa Bossing sa tunga-tungang mga kuwarter, 60-29, dayon na ngadto sa 31 puntos nga demolisyon.

Si Arana mipupo og 19 puntos ug 11 ka rebounds, si Baltazar mirehistro sab og double-double nga 16 puntos ug 11 ka rebounds samtang si Winston mitali og 16 puntos, tulo ka rebounds ug lima ka assists alang sa FiberXers.