NorthPort gilihian og daog, NLEX namawi

CEBU, Philippines — Sila si Arvin Tolentino ug William Navarro mikuha og atensiyon sa dihang giablihan sa NorthPort Batang Pier ang ilang kampanya pinaagi sa 97-75 nga demolisyon sa Terrafirma Dyip sa PBA Philippine Cup niadtong Sabado sa gabii, Abril 12, didto sa Ninoy Aquino Stadium sa kaulohan.

Ang Best Player of the Conference sa miaging Commissioner's Cup kuwang lang og duha rebounds aron morehistro og triple-double human siya mipupo og 19 puntos, 12 ka assists ug walo ka rebounds aron ituboy ang Batang Pier ngadto sa impresibong sinugdanan.

Ubos sa liderato ni Tolentino, gilabhan sa NorthPort ang Terrafirma sa assists department, 27-12.

"Maganda ball movement namin for this game. We had 27 assists na sana ma-capitalize namin for our next games, especially this coming Wednesday," matud pa ni NorthPort assistant coach Rensy Bajar.

Wala sab magpabitin si Navarro nga mihipos og double-double uban ang 18 puntos ug 10 ka rebounds.

Sila si Joshua Munzon, Allyn Bulanadi ug Sydney Onwubere mihipos og dili mominus 10 puntos matag usa alang sa  NorthPort, nga misirado sa unang kuwarter pinaagi sa nagkayong 12-0 rally sa wala pa miposte og 24 puntos nga labaw, 85-61, sa nahibilin nga 5:55 sa duwa.

Sila si CJ Catapusan ug Kevin Ferrer nagkumboya'g 31 puntos apan pareho silang naminghoy kay ang Terrafirma nasagunsonan og duha ka pilde human midaog sa una nilang duwa.

Sa laing bahin, ang NLEX Road Warriors namawi sa miagi nilang kaparotan sa mga kamot sa San Miguel Beermen pinaagi sa 109-95 nga pagpayaka sa Rain or Shine Elasto Painters.

Si Xyrus Torres mipabuhagay og 28 puntos luyo sa mahait niyang tinirahan diin siya kausa lamang masipyat sa 12 niya ka itsa samtang ang beteranong si Robert Bolick mikolekta og 23 puntos, 12 ka assists ug pito ka rebounds.

Dako sab og naambag si Anthony Semerad nga mitimbre og 18 puntos ug pito ka rebounds ingon man si Javee Mocon nga mikimada og 12 puntos ug 10 ka rebounds alang sa unang daog sa Road Warriors ning panapos sa season nga komperesensiya.

Abante unta ang E-Painters og 11 puntos sa sayong bahin sa duwa apan ang Road Warriors milusad og eksplosibong resbak aron ilogon ang labaw, 32-25, human sa unang kuwarter sa hingpit.

Si Caelan Tiongson maoy nangu sa Rain or Shine bitbit ang 24 puntos samtang sila si Leonard Santillan, Jhonard Clarito ug Gian Mamuyac nagkumbinar og 35 puntos sa pilderong kawsa.