Erediano, Hermosa nanghawod sa IronKids
CEBU, Philippines — Gidominar sa pambato sa Sugbo nga sila si Moira Frances Erediano ug Matthew Hermosa angtagsa-tagsa nila ka dibisyon sa Alaska IronKids Philippines kagahapon didto sa Shangri-La's Mactan Resort and Spa sa Dakbayan sa Lapu-Lapu.
Sila si Erediano ug Hermosa parehong mga sakop sa Talisay Luigi Triathlon Group (TLTG)-Go For Gold team.
Si Erediano nga estudyante sa Sacred Heart School-Ateneo de Cebu, milangkat sa ikatulo niyang sagunson nga titulo sa girls 13-14 division.
Iyang gihuman ang makutas nga lumba nga naglangkob 400m swim, 12km bike ug 4km run sa oras nga 39 minutos ug 22.01 segundos.
Si Jeanna Mariel Cañete maoy mipahiluna sa ikaduha sa oras nga 40:38.71 ug gisundan ni Kelly Yw Long sa oras nga 43:24.46.
Sa iyang bahin, si Hermosa, ig-agaw ni national team member Andrew Kim Remolino, mipakurat sa inilog niyang teammate nga si Earol Belonguil aron birahon ang korona sa boys 13-14 age group sa oras nga 35 minutos ug 8.33 segundos.
Si Belonguil mitapos lamang sa ikaduhang puwesto sa oras nga 35:43.04, samtang si Eryk John Omandam maoy ikatulo sa oras nga 36:02.78.
Naapil sab sa listahan sa mga mananaog mao sila si Van Wincy Pagnanawon (boys 9-10), Kira Ellis (girls 11-12), Michael Gabriel Lozada (boys 11-12), Eleora Caelle Avanzado (girls 9-10), Lauren Lee Tan (girls 6-8) and Diego Jose Dimayuga, (boys 6-8).
- Latest
