Cobras, Baby Jaguars korona ang puntarya
CEBU, Philippines — Ang Southwestern University (SWU)-Phinma Cobras ug University of San Jose-Recoletos (USJ-R) Baby Jaguars parehong kampiyonato ang puntariya, apan angayan sila mangandam sa usa ka dakong gubat batok sa ilang mga karibal sa Game-2 sa "best-of-three" 2019 Cebu Schools Athletic Foundation, Inc. (CESAFI) Partner's Cup finals diha sa Cebu Coliseum karong adlawa.
Nagsandig sa balanse nilang opensiba diin lima sa ilang players ang mikadlit og double figures, ang Cobras milampaso sa ARQ Builders-University of the Visayas (UV) Green Lancers, 91-73 sa Game-1 niadtong Biyernes sa gabii aron pagtikang ngadto sa usa na lang ka daog aron sakmiton ang korona sa seniors division.
Si Shaq Imperial maoy nangu sa mainit nga ratsada sa Southwestern University uban ang 21 puntos, apil na ang upat ka tres.
Si William Polican miamot og 19 puntos, si Dyll Roncal miiskor og 14, samtang sila si Red Cachuela ug Senegalese wingman Lamine Thiam nagkumboya og 21 puntos alang sa kadaogan sa Cobras.
Sila si Imperial ug Roncal nagkumbinar og 19 puntos sa nagdilaab nilang 32-12 nga ataki sa unang kuwarter nga nakapabarag sa Lancers sa nahibiling bahin sa duwa.
Mahimo nang langkaton sa Cobras ang titulo kon ugaling payak-on nila og usab ang Lancers human sa ilang engkuwentro sa alas-7 sa gabii.
Sama sa Cobras, ang Baby Jaguars naglaraw sab nga dimdimon na ang katam-is sa kampiyonato sa dihang ilang sangkaon ang Cebu Landmasters/Sacred Heart School-Ateneo de Cebu (SHS-AdC) Magis Eagles sa Game-2 sa juniors division finals karong alas 5:30 sa hapon.
Ang Baby Jaguars nakaipsot batok sa Magis Eagles, 61-56 aron pagposte og 1-0 nga bentaha sa kaugalingon nilang serye.
- Latest
