Cabilao 4 na ginto ang tinangay sa PSC Paragames
CAGAYAN De Oro City, Philippines — Umani ng apat na gintong medalya si Jake Cabilao ng CDO National High School sa swimming para maging most bemedalled athlete sa pagtatapos ng 2018 Philippine Sports Commission-Differently-Abled Sports 4 LIFE Paragames na ginanap sa Xavier University–Ateneo de Cagayan Sports Complex dito.
Ipinakita ng 17-anyos na si Cabilao ang sapat na determinasyon upang dominahin ang boys 50-m freestyle, 50-m backstroke, 50-m breastroke at 50-m butterfly sa huling araw ng kumpetisyon na inoorganisa ng PSC at sinusuportahan ng Cagayan de Oro City government.
Sa athletics, nakasungkit din ng dalawang gintong medalya si Gabriel Lumani ng Indahan Elementary School matapos magwagi sa boys 100-m dash at long jump sa Partial Visual Impairment-Elementary category.
“I’m very proud of my son. He really pushed himself up para manalo ng gintong medalya sa athletics. He deserved it,” sabi ni Catherine Lumani, ina ni Gabriel.
Nakakuha rin ng tig-dalawang ginto sa swimming sina Jamie Dapat ng West City Central School mula sa girls 50-m freestyle at 50-m breastroke at si Mariell Ann Olivina ng Bulua National High sa girls 50-m backstroke at 50-m butterfly.
- Latest
