P15 milyones gibanabanang igahin sa cpsc alang sa 'sports for all program'

CEBU, Philippines — Gibanabana moabot sa P15 milyones ang igahin sa Cebu Provincial Sports Commission  (CPSC)   nga gamiton sa pagpamalit og nagkadaiyang sport  equipments nga iapud-apod sa mga local government units ug sa bag-ong provincial covered court.

Matud ni  CPSC chief executive Atty. Ramil Abing,  nga  P5 ngadto sa P10 milyones ang ilang pangayuon nga badyet sunod tuig alang sa pagpalit sa mga ekipo ug kagamitan sa paugnat sa kusog nga gipangayo sa mga barangay sa lungsod ug dakbayan alang sa Sports for All Program.

Samtang mogahin usab og P5 milyones ang Kapitolyo alang sa paliton nga ekipo sa kasamtangang gitrabaho nga provincial covered court nga anaa nahimutang sa Sitio Sudlon barangay Lahug Dakbyan sa Sugbo.

"Ang kulang na lang ana kay equipments, like gamit kay naa man nay fitness gym, weightlifting gym, basketball court  ang ring ana, volleyball equipment, kay multi-sports man ang training center diha", matud ni Atty. Abing.

Ang P19.96 million  nga kantidad sa maong pasilidad gipaabot  nga mahuman ug mahimong operational sa bulan sa Marso sunod tuig.

Nagkanayon si Atty. Abing nga magpadayon ang ilang pagtabang sa training ug pag-apil sa  mga kabatan-onan  sa Lalawigan sa Sugbo  ilabina ang kadtong mga mosangka sa national competition sama sa Palarong Pambansa.

Apil sa  ipadayon nga mga programa sa provincial sports commission mao  ang Inter-municipality tournament sama sa basketball ug volleyball.