Team nilang Baby James ug Bordz daog dayon
CEBU, Philippines - Ang Team 2 nilang co-owners Jay ‘Baby James’ Gabuya ug Dennis ‘Bordz’ Maglasang gisubhan dayon og daog pinaagi sa paglubong sa Team 1, 90-79 sa pagsugod sa LEAD Basketball Christmas League 2016 niadtong Miyerkules didto sa Kai Sports Complex sa Lilo-an, Cebu.
Gipangulohan ang kadaugan sa managsuong Mendoza nga sila si James ug Juneray. Si James miburak og 17 puntos, samtang si Juneray mikadlit og 16 puntos sa Team 2 nga abante og 11 puntos sa halftime, 41-31.
Balanse pa ang duwa sa duha ka kampo sa first period, apan ang co-owner nga si Bordz Maglasang mipasud sa iyang sunod-sunod nga puntos aron moabante. Dali hinuon nalamoy sa Team 1 ang labaw hinungdan nga nagtabla kini paghuman sa maong kuwarter, 16-all.
Diha na misalida ang managsuong Mendoza sa second period nga nagbanos-banos og pamuntos.
Misamot kasihag ang kadaugan sa Team 2 human ang laing playing team owner nga si Baby James mipasud sa iyang 3-pointer sa nahabiling 40 segundos.
Sila si Baby James Gabuya ug Bordz Maglasang nagkumboya og nuybe puntos sa ilang team.
Sa laing duwa, gisugat sab og daog ang Team 3 ni Dalmasio Maglasang batok sa Team 4 sa iskor nga 89-78.
Namugna ang torneyo pinaagi sa mga paningkamot sa mga opisyales sa LEAD pinangulohan sa ilang presidente nga si Jun Maglasang. Lain pang mga opisyales sa LEAD ballclub naglakip nila ni Ariel Olivar (VP-Internal), Jun Cabrillos (VP-External), Boy Agcang (secretary) ug Lebrian Pepito Donasco (treasurer).
Puntos matag usa
Unang duwa:
TEAM 2 (90) – Ja. Mendoza 17, Ju. Mendoza 16, Kado 13, Zamora 10, Bacalso 6, Baby James 5, Manto 5, Bordz 4, Cdu Pepito 4, Pilapil 4, Cañete 2, Talisic 2, Raffy 2.
TEAM 1 (79) – Pilapil 21, Labradores 16, Dogers 12, Bernabe 9, Jayneel 8, Pato 7, Jumapao 5, Barientos 1.
Ikaduhang duwa:
TEAM 3 (89) – Magdadaro 21, Catipay 20, Bulak 16, Delantes 9, Pareja 9, Maglasang 6, Quiño 3, Rosales 2, Abala 2, Abendan 1.
TEAM 4 (78) – Laboc 18, Jugalbot 17, Takayuki 10, Escarde 9, Popoy 8, Yuson 8, Desiderio 7, Fermilan 1. (BANAT NEWS)
- Latest
