Pacquiao determinadong i-knockout si Bradley

MANILA, Philippines – Determinado si Filipino world eight-division champion Manny Pacquiao na talunin si world welterweight king Timothy Bradley Jr. bago niya lisanin ang boxing na kanyang pinagbuhusan ng 20 taon.

Ito ang sinabi ni Pacquiao sa kanyang pagbabalik mula sa press tour sa United States para paingayin ang kanilang pangatlong paghaharap ni Bradley sa Abril 9 sa MGM Grand sa Las Vegas, Nevada.

“Start na tayo siguro ng training para maipanalo natin itong huling fight,” wika ng 37-anyos na si Pacquiao, nagdesisyon nang magreretiro matapos ang kanilang ‘trilogy’ ng 33-anyos na si Bradley, sa kanyang pagbabalik sa bansa kasama ang asawang si Jinkee noong Sabado ng gabi.

Matapos ang naturang laban kay Bradley, ang kasalukuyang World Boxing Organization welterweight king, ay sisimulan naman ni Pacquiao ang kanyang pangangampanya para sa pangarap na posisyon sa Senado sa national elections sa Mayo.

Bubuksan ni ‘Pacman’ ang kanilang training camp ni chief trainer Freddie Roach sa susunod na buwan sa General Santos City bago lumipat sa Wild Card Boxing Gym sa Hollywood, California dalawang linggo bago ang kanilang upakan ni Bradley.