Javier kumuha ng bronze medal sa Beach Games
PHUKET, Thailand – Inangkin ni Robeno Javier ang bronze medal sa men’s duathlon para ipagpatuloy ang pagkolekta ng bansa ng medalya sa 4th Asian Beach Games dito.
Pumangatlo si Javier, ang top male duathlete ng bansa, sa likod nina gold medalist Ryo Sueoka at Yuya Fukaura ng Japan sa five-kilometer run, 20km bike and 2.5km run event na idinaos sa Sirinat National Park.
Umabante si Sueoka sa huling kilometro para magtala ng bilis na 54 minuto at 20 segundo at iwanan sina Fukaura, na naglista ng 54 minuto at 25 segundo.
Naorasan si Javier ng 54:57 kasunod sina Indonesian Johan Jauhari (56:00) at Filipino Carlo Pedregosa (56:30).
Tumapos naman sa pang-apat na puwesto sa women’s division si world championship campaigner Mirasol Abad.
Si Japanese Yuri Kato ang nagreyna sa kanyang bilis na 1:02:58 kasunod sina Long Hoi ng Macau at Matsumoto Fumika ng Japan.
Nagsumite si Abad ng oras na 1:08:04 kasunod ang kababayang si Miscelle Gilbuena (1:09:22).
Nauna nang nakakuha ng dalawang gold medal sina Annie Ramirez at Maybelline Masuda na sinundan ng bronze medal ni John Baylon sa ju-jitsu.
- Latest
