Pagara, Meraz misaad og giyera sa Pinoy Pride 26

CEBU, Philippines - Walay atrasay, mao kini ang gisaad nila ni WBO International light welterweight champion Jason  Pagara (33-2, 20KOs) ug Mexican brawler Mario  Meraz (20-3, 16KOs)  sa  main event sa "Pinoy Pride 26: Fists of the Future" ugma sa gabii diha sa Waterfront Cebu City Hotel and Casino.

Human madungog ang pamahayag ni Meraz nga matud pa mianhi siya sa nasud alang sa usa ka dakung gubat, ang ALA Gym boxer nga si Pagara miingon nga andam siyang  makighilam-osay og kumo  ni Meraz.

Gipasalig ni Pagara  nga mohimo'g  impresibong kadaugan alang sa mga Cebuano fans.

"Importante ni nga away alang nako. Gusto ko og impressive nga daog, makaingun gyud ko nga adunay knockout ning awaya," matud pa ni Pagara atol sa final press conference kagahapon didto sa Aegean room sa Waterfront Hotel.

Ang garbo sa Cagayan De Oro City nga si Pagara gusto mopakita nga nalakip siya sa elite ranks sa mga fighters sa 140 lbs. division ug ang paghimo og nindot nga kadaugan batok ni Meraz makatabang kaniya aron  ilhong world title contender.

"I think he (Pagara) improved incredibly but this fight will show if what he is really made off," matud pa ni ALA Promotions President and CEO Michael Aldeguer.   "If he will win this fight, I am planning to send him to the United States and train in preparation for bigger fights in the future."

Sa iyang bahin, si Meraz    kompiyansa nga iyang mapilde si Pagara ug mopakgang sa plano sa Filipino boxer alang sa usa ka world title shot.

Sa supporting main event, ang manghod ni Jason nga si 'Prince' Albert (20-0, 14KOs) moatubang sa labing lisud nga hagit sa iyang karera batok sa una niyang Mehikanong kontra nga si Hugo Partida (21-4, 16KOs).

"Wa ko mahadlok niya (Partida). Salig ko sa akong abilidad ug kahibawo ko nga sakto ko sa preparasyon aron mapilde siya," matud pa ni Albert nga mosuway pagsakmit sa IBF Intercontinental light featherweight crown.

Sa undercards, si former two-time world title challenger AJ 'Bazooka' Banal (30-2, 21KOs) makigsukmagay sa unbeaten Indonesian Defry Palulu (10-0, 9KOs), samtang si Jimrex Jaca (30-0, 22KOs) moaway batok ni Japanese Masayoshi Kotake (9-8, 5KOs).

Ang official weigh-in sa Pinoy Pride 26 gitakda karong alas-12 sa udto diha sa Robinson's Fuente.