SRP Sunday Club andam na modawat bag-ong miyembro
CEBU, Philippines - Gipahibalo ni SRP Sunday Club president Rom Castañeda nga ang ilang grupo andam na nga modawat og mga bag-ong miyembro.
Pagpangandam kini alang sa umaabot nilang SRP Sunday Club Summer League basketball tournament nga gikatakda karong bulan sa Abril.
"Bisa'g kinsa mahimong magpamiyembro, dili lang kay sa Mandaue ra ni siya, kun dili hasta sab ang taga-Lapu-Lapu, Cebu City ug sa mga silingang dakbayan," matud pa ni Castañeda.
"Gikinahanglan nga magpangedaron siya og 40-anyos," dugang pa niya.
Sa kasamtangan, ang SRP Sunday Club adunay 131 ka miyembro. Natukod kini niadtong tuig 2008 ubos sa ilang founder nga si Engr. Lito Florentino uban nilang Dr. Bernard Mansueto, Joy Miñoza, Ricric Fontanosa, Dante Orejudos ug Joel Dublin.
Gisuportahan sab kini ni Rev. Fr. Rolyn E. Vics, CM, ang parish priest sa San Roque Parish ug Rev. Fr. Jovencio Rendon, coordinator sa Sunday Club.
Gawas ni Castañeda, lain pang mga opisyales sa SRP Sunday Club ning tuiga naglakip nilang Jun Atillo (vice president), Ruben Flores (secretary), Glenn Castañeda (treasurer), Arnold Aventajado (auditor) ug Nonoy Amora ug Melio Colina (PROs).
Si Mandaue City Vice Mayor Glenn Bercede ug Amay Dy maoy ilang advisers.
Ang tinuig nilang liga suportado sab ni Subangdaku Brgy. Capt. Ernie Manatad. (BANAT NEWS)
- Latest
