ROS kompiyansa modaog batok Barako Bull

CEBU, Philippines -  Kompiyansa ang Rain or Shine Elasto Painters nga mopintal sa ikaduha nilang sunod-sunod nga daog human mohimo'g "upset" nga kadaugan batok sa Petron Blaze Boosters.

 Ang kadaugan sa Painters maoy mohatag nila'g luna alang sa quarterfinals sa PBA Philippine Cup.
 Ang Rain or Shine makigsangka sa Barako Bull Energy Cola sa alas-8 sa gabii human sa duwa tali sa Alaska  Aces ug San Mig Coffee Mixers nga gikatakdang sugdan sa alas-5:45 sa  hapon.
 Ang Rain or Shine maoy mipahamtang sa labing unang pilde sa powerhouse Petron niadtong  Sabado ug gumikan niini nag-awas ang ilang kompiyansa nga ilang mabuntog sa yano nga paagi ang Barako Bull.
 Ang Elasto Painters nagtangag og 5-3 win-loss record ug ang kadaugan karon maoy motukmod nila sa ikaupat nga dapit sa standing sunod sa Barangay Ginebra San Miguel (8-1), Petron (7-2) ug Talk ‘N Text Tropang Texters (6-2).
 Sa ilang bahin, ang Barako Bull nga adunay rekord nga 3-6, maninguha sab  nga modaog aron mahayagan pa ang ilang paglaum nga masulod sa playoffs ug ingon man malikayan ang sayong pagkatagak sa elimination round. (BANAT NEWS)