Pinay boxers pipiliting makalusot sa finals

NAY PYI TAW--Tatlong Filipina boxers ang masusubukan ang husay sa ka­nilang mga laban sa se­mifinals ng women’s boxing competition sa 27th Southeast Asian Games ngayon dito sa Wunna Theikdi Stadium.

Lalabanan nina light-flyweight Jose Gabuco, flyweight Maricris Igam at bantamweight Irish Magno ang mga lady boxers mula sa Laos at Thailand.

Sasagupain ni Gabuco, ang gold medal winner sa pinweight category sa nakaraang SEA Games, si Laotian Sornka Chanta­vonsra, habang makakatapat nina Igam at Magno sina Supida Satumrum at Peamwilai Loapeam ng Thailand, ayon sa pagkakasunod para samahan si Nesthy Petecio sa finals.

Nakapasok si Petecio sa gold-medal duel matapos talunin si Tassamalee Tsongjan ng Thailand via unanimous decision sa kanilang women’s feather­weight semifinal clash no­ong Martes.

Makakalaban ni Petecio si New Ni ng Myanmar sa finals sa Sabado.

“This tournament is turning into a Philippines-versus-Thailand series,” sabi ni Association of Bo­xing Alliances of the Philippines (ABAP) executive director Ed Picson.

 Sa men’s side, anim na local boxers sa pangu­nguna ni London Olympian Mark Anthony Barriga ang aakyat ng ring sa Biyernes kontra Mohd Faud Reuvan ng Malaysia sa light flyweight class.

Makakasagupa naman ni flyweight Rey Saludar si Mg Nge ng Myanmar; haharapin ni Mario Fernandez si Tran Quocc Viet ng Vietnam sa bantam; susukatan ni lightweight Junel Cantancio si Muhamad Ridhwan Ahmad ng Singapore; makikipagsuntukan si light welterweight Dennis Galvan kay  Ericok Amonopunyo ng Indonesia at titipanin ni welterweight Wilfredo Lopez  si Alex Ta­tantos ng Indonesia.