Necesario bugtong Sugbuanon naka-gold sa Tru Flex NAGT championships

 CEBU, Philippines - Magduduwa sa University of the Visayas (UV) nga si Changmai Necesario mao lang ang bugtong Sugbuanon

nga nakakuha'g bulawang medalya sa 14th Tru-Flex National Age-Group Tennis Championships  nga natapos kagahapon

didto sa Lapu-Lapu City tennis courts.

 Si Necesario, kinsa moduwa sa Palarong Pambansa yano kaayong midemolis sa laing Sugbuanon nga si Joshua

Kinaadman sud sa straight sets, 6-0, 6-1 aron maghari sa boys 18-under division.

 Si Kinaadman nahimo sab nga runner-up sa 18-under doubles dihang siya ug iyang kapares nasugamak ngadto

nilang Marc Norman Enriquez ug Clyde Bienes, 3-6, 6-2, 10-8.

 Sa laing bahin, si Nio Tria Picache mikabkab og duha ka kampiyonato.

 Si Picache, ang anak sa aktres nga si Cheri Pie Picache, mipukan ni Tristan Kwok sa Hong Kong sa boys 12

final, 6-3, 6-4. Si Picache ug Jacob Martin nidaog sab og bulawan sa boys 14 doubles pinaagi sa pagmasaker  nilang

Cesar Kristofer Salimbangon ug Harvey Gilbuena, 6-0, 6-1.

 Nakalahutay si Alexandra Eala sa makutas ug lisud nga duwa sa final batok ni Chu Kei Leung, 5-7, 7-6, 7-5

aron langkaton ang  unisex 10-under title, samtang si Bryan Otico naghari sa boys 14 human niya gipilde si Fabien Callaud,

4-6, 6-4, 6-3.

 Sa pikas bahin, sila si Khim Iglupas ug Roxanne Mae Resma   misakmit sab og titulo ug runner-up finish matag

usa.

 Si Iglupas milangkat sa korona sa girls 16 human niya gibuntog si Resma, 6-2, 6-3.  Hinuon si Resma

nakabawos ngadto ni Iglupas, 6-2, 6-2 aron sakmiton ang girls 18 category crown.

 Nakakawat sab og atensiyon ang Hong Kong-based Sri Lankan nga si Adithya Karunarante human niya

giharos ang girls 14 ug 11 age group batok nilang Angela Cabaral ug Carlyn Bless Guarde. (BANAT NEWS)