Roach apektado sa sakit?

Nagtuo si kanhi British boxing champion Amir Khan nga mihuyang ang abilidad ni Hall-of-Famer coach Freddie Roach nga mahimong usa ka epektibong boxing trainer.

Si Khan kinsa mihawa na sa poder ni Roach human sa sunod-sunod niyang kapildehan mihulagway sa sakit ni Roach nga ‘Parkinson’s disease’ nga usa sa babag sa karera ni Roach isip trainer.  (LPM)

Jordan sundon ni Yap

Gusto ni San Mig Coffee Mixers coach Tim Cone nga sundon ni two-time MVP James Yap ang gibuhat ni NBA legend Michael Jordan nga misamot ka-epektibo gamit ang ‘triangle offense’.

Si Cone kinsa maoy nagpasiugda sa ‘triangle offense’ sa PBA, misalig sa abilidad ni Yap nga maoy mahimo nilang numero unong hinagiban sa opensa. (LPM)

Sakyanan ni Stoudamire naunlod

Usa si New York Knicks forward Amare Stoudamire sa grabeng naapektohan sa kusug nga hurricane ‘Sandy’ nga miigo sa pipila ka syudad didto sa Estados Unidos.

Gamit ang iyang camera, gipakita ni Stoudamire ang iyang mga kabtangan lakip na ang mahalon niyang sakyanan nga nalunod sa baha sa ilang panimalay. (LPM)

MVP mutabang gihapon

Bisan pa og miatras siya sa tanyag nga magpapili isip presidente sa Philippine Olympic Committee (POC), si sports patron ug business tycoon nga si Manuel V. Pangilinan (MVP) mutabang gihapon sa programa sa gobiyerno sa sports.

Si Pangilinan nagkanayon nga sento porsiyento gihapon ang iyang suporta sa tinguha sa nasud nga makakuha pagbalik og gold sa Olympics. (LPM)