Parehong butlog

Nakakita ko bisan sa karat kaayong reception sa Studio 23 didto sa among lugar sa duwa sa Azkals ug sa Bahrain nga diin nagtabla ang duha nga "butlog" o zero ang iskor paghuman sa kapin sa 90-minutos nga full time play sa ilang Middle East friendly match didto football stadium sa Manama, Bahrain.

Ambot lang kun mao na ba gyud kadto ang kinatibuk-ang national team sa maong nasud tungod kay naglisud man gyud sila pag-iskor batok sa atong mga Azkals sa maong duwa. Gani daghan pa kaayo ang chances sa mga Pinoy nga makakuha bisan usa ka punto.

Hinuon okey ra pud to kay kun buot huna-hunaon layo ra kaayo sa FIFA ranking ang Azkals (147) itandi sa Bahrain nga rank 115. Nagpasabot nga mas taas sila nato tungod sa kataas sa ilang kasinatian sa maong duwa. 

Sunod nga makasangka sa Azkals mao ang Kuwaiti national team sa Oktubre 16. Sa sangka unya sa Kuwait makaapil na seguro pagbalik ang magsuong Phil ug James Younghusband, kinsa naapil unta sa line-up sa ME friendly matches apan wala makaapas tungod sa ilang commitment sa ilang mother football club nga Loyola Meralco Sparks.

Ang Azkals subsob nga nag-ensayo alang sa umaabot nga 2012 ASEAN Football Federation Suzuki Cup sunod bulan. Sa 2010 Suzuki Cup nabantog ang mga Pinoy sa soccer human sa malampusong kampanya niini bisan wala mahimong kampiyon nakab-ot nila ang labing taas nga level sa Philippine football.

* * *

Duna ko'y daghang nahimamat nga mga tawo nga kaniadto mga eskrimador diay, apan gumikan sa kawad-on nawala ang ilang pokus sa maong matang sa martial arts aron buhion ang ilang mga pamilya. Adunay uban nagumon sa bisyo.

Ambot lang kun kining nagumon sa dautang bisyo og balido ba ang ilang rason nga ilang gibaylo ang kapiskay sa panglawas nga makuha gikan sa martial arts o tungod lang ba kaha kay nawad-an na sila'g gana o wala lang gyu'y oportunidad nga makabaton og kaugalingong gym.

Sa pagkatinuod, dili kalikayan nga dunay dakung kompetisyon tali sa nagkadaiya natong mga estilo sa eskrima o arnis ilabi na dinhi sa Sugbu. Adunay uban nga nangalaya na lang, samtang ang uban milambo ug naila na karon sa ubang kanasoran.

Alang niadtong mga milambo ato silang pakpakan ug suportahan kay sa ilang paningkamot milampos sila sa pagpakatap sa ilang estilo. Sa mga wala na mopadayon pa sa martial arts hinaut nga malipayon kamo sa inyong gipiling direksyon.

* * *

PAHIBALO: Ang Alpha Sigma Omega International Collegiate Service Fraternity and Sorority (SIOUX) mopahigayon og SIOUX Family Day karong Oktubre 21 didto sa lungsod sa San Fernando. Imbitado ang tanang sakop sa National, City and Municipal, Provincial ug Regional Board Members ug tanang sakop sa Grand SIOUX Alumni Council (GSAC) ug tanang chapter officers and members. For more inquiries contact Bros. Ramsa, Cal, Machete, Oliver and other officers in your respective chapters.

PagtulOn-an: Kinahanglang tun-an nga maminaw sa kaugalingon aron sa ingon makamatngon ka sa imong gipanulti sa uban.

[email protected]