Escarinas, Asumin hawod sa "1st Maternity Run"

CEBU, Philippines - Gidominar nilang Tessie Escarinas ug Loselyn Asumin ang special categories sa labing unang "Maternity Run" nga gipasiugdahan sa Cebu Puericulture and Maternity House Inc. (CPMHI) kagahapon didto sa B. Rodriguez st., ning siyudad.

Si   Escarinas mipatigbabaw sa 10K race alang niadtong nanganak sa Maternity nga mioras og 54 minutos ug tres segundos. Si Hannah Gaco mipahiluna sa ikaduha sa oras nga 57:13, samtang si Marie Fe Ernane mitapos sa ikatulo sa iyang 58:32.

Sa iyang bahin, si Asumin maoy nag-una sa women's 10K race nga gipanganak sa CPMHI sa oras nga 1:03:12, gisundan ni Patricia Tumulak (1:04.17) ug Sunshine Cunanan (1:08.35).

Sa men's category, si John Paul Ernani mitapos sa dagan sa oras nga 46 minutos ug 26 segundos. Kenneth Toledo mipahiluna sa ikaduha (51:16), gisundan ni Kareem Durano (51:20).

Sa laing bahin, ang Kenyan nga si Josphat Kiptanui ug teen running sensation Lovely Andrin maoy midominar sa 10K open.

Si Kiptanui maoy naghari sa 10k men’s premier sa oras nga 32:59. Gisundan sa iyang mga kababayan nga sila si Abraham Missos (33:46) ug Francis Kakui (34:24) isip second ug third placers.

Sa iyang bahin si Andrin mao usab ang nanghawod sa women’s class sa oras nga 43:49. Gipilde niya silang si Joeyry Lee (44:17) ug Lenly Cardenas (45:56) kinsa mipuwesto sa mosunod nga mga dapit.

Sa 3k open, si Chobie Duenas maoy labing paspas sa male division sa oras nga 10:43, samtang si Desiree Salas sa women's class sa oras nga 17:16.