2012 Power Forty Christmas League buksan na ugma

 CEBU, Philippines - Sugdan ugmang adlawa sa UTASSCO Utility ni Atty. Flor Yosores ang ilang kampanya sa pagdepensa sa korona dihang ilang ikasangka ang Talisay Basketball Association (TBA) Above 40 ni councilor Rudy Cabigas sa 2012 Power Forty Christmas League diha sa Inayawan Sports Complex.

Adunay walo ka teams ang mosalmot sa torneyo diin ang tanang koponan mopakita dayon kini og aksiyon sa opening day.

Unang magtigi sa alas-7 sa buntag mao ang Ang Tibay Mo ug Jinjec Commercial, sundan kini sa duwa tali sa UTASSCO ug TBA sa alas-8.

Ang Water Market mosukod sa abilidad sa Allyn & Sons sa alas-9 sa buntag ug ang Park N' Go Bakeshop makigbatok sa ALFA Marketing sa alas-10 sa buntag.

Matud pa ni commissioner Edwin Dejacto, ang torneyo mosunod sa single round robin format diin ang Top Four   maoy moabante sa semifinals.

Ganting salapi ug tropeyo ang madawat sa  semifinalists.

Ang awarding ceremony  sa Disyembre 25 diha sa Inayawan Sports Complex  atol sa Christmas Party sa tanang sakop sa Power Forty.  (BANAT SPORTS)