ORYA Farms/COMFA, Aries Lending subha'g daog

CEBU, Philippines - Nangayo pa og overtime ang ORYA Farms/COMFA una nila maangkon ang daog batok sa AJY Bong, 70-67 sa pagsugod sa Lapu-Lapu Sports Club 2012 basketball tournament niadtong Domingo didto sa Crown Regency gym sa Lapu-Lapu City.

Sayo unta nga makuha sa ORYA Farms/COMFA General Merchanise nilang Elly Gomos ug Roger Ompad ang daog dihang milabaw kini og dos puntos, 62-60 sa daginutong segundos sa duwa, apan si AJY Bong team owner Alan Yu mitusak sa iyang mahinungdanong puntos dayon kapupos sa oras nga mipatabla sa iskor, 62-all hinungdan sa overtime.

Sa dugang singko minutos, padayon nga nagsinukliay sa ilang mga puntos ang duha ka kampo, apan ang ORYA Farms/COMFA General Merchandise maoy nakalahutay sa mga hagit ug pagsuway alang sa una nilang daog.

Ang kanhi USPF cager nga si Sherwin Candilada maoy kinadak-ang nakuha nga iskor alang sa ORYA Farms sa iyang 26 puntos, gisundan ni Roger Ompad nga adunay 11 puntos.

Lima ka players ang miiskor og double figures alang sa naparot nga AJY Bong nga gipangulohan ni Adrian Godornez pinaagi sa iyang 15 puntos.

Sa pasiunang duwa, gisugat sab og daog ang Aries Lending ni Tito Francisco human nila gilubong ang Mega LA/Johnmar nilang Lheo Almacin ug Marlon Llenes sa iskor nga 79-68.

Silang Rey Sandal ug Michael Almodal parehong misansan og 18 puntos aron pangulohan ang Aries Lending, samtang ang Mega LA/Johnmar gipangulohan sab ni Rene Cuarda, kinsa mirehistro og 19 puntos.

PUNTOS MATAG USA

Unang duwa:

ARIES LENDING (79) - Sandal 18, Almodal 18, Waray 13, Artiaga 11, Inot 9, Miranda 6, Bengara 6, Patalinghug 5, Francisco 4

MEGA LA/JOHNMAR (68) - Cuadra 19, Ngujo 18, Booc 10, Llenes 6, Almacin 4, Amodia 3, Antia 3, Gutib 2, Aparta 2, Asuncion 1

Ikaduhang duwa:

ORYA FARMS/COMFA (70) - Candilada 26, Ompad 11, Bancale 9, Calambro 8, Ilustrisimo 6, Casinillo 4, Alsado 2

AJY BONG (67) - Godornez 15, Tero 12, Yu 11, Ochea 10, Genolos 10, Flores 7, Gimene 6, Aton 1 (BANAT SPORTS)