"El Metodico" milan Melindo nakalingkawas

CEBU, Philippines - Nasinati ni ALA Gym boxer Milan ‘El Metodico’ Melindo (28-0, 11KOs) ang labing lisud nga sangka sa iyang karera diin midaog siya pinaagi sa majority decision batok ni kanhi Venezuelan world champion Jean Piero Perez (19-5, 14KOs) sa main event sa "Pinoy Pride XVI:Venezuelan Invasion" sa miaging gabii didto sa Waterfront-Cebu City Hotel and Casino.

Si Melindo milampos pagdepensa sa iyang WBO International flyweight title, apan dili sayun ang iyang giagian tungod kay mipamatuod usab sa iyang kalig-on ug talagsaong abilidad si Perez kinsa isug usab nga nakigsinukliay sa Pinoy world title contender hangtud sa 12 rounds.

Sa sangka tali sa duha ka technical boxer, mipakita dayun sa iyang kusug ug kapaspas si Melindo sa sayung bahin sa away diin iyang gipauwanan og kombinasyon sa ulo ug lawas si Perez.

Mipasulod usab og solidong uppercut si Melindo sa sixth round nga mitay-og ni Perez, apan kadto na ang katapusang higayun nga midominar si Melindo dihang nagisian siya sa iyang walang kilay agi sa kumo ni Perez.

Gikan didto nakuhaan ang ka-agresibo ni Melindo og nakakuha usab og kompiyansa si Perez nga mopasud og kaugalingon niyang mga power-shots.

Hinuon, bisan pa og nagkadugo, isug nga misukol og sinukmagay si Melindo hangtud sa katapusang bagting sa kampanilya. Human sa dose ka hugna nga sinukmagay si Melindo migawas nga nakapabor sa scorecards—115-113, 116-112 ug 114-114.

“Gusto gyud nako siya (Perez) tumbahon pero lig-on pud siya ug naglisud pud ko tungod sa cut sa akong kilay, naapektohan ako panan-aw maong maglisud nako pagpaigo sa akong kumo,” matud pa ni Melindo.

Sa iyang bahin, si ALA Promotions President Michael Aldeguer nagtuo nga ang maong away magsilbeng pahimangnu ni Melindo nga sugod karon dili na sayun ang mga atubangon niining away paingun ngadto sa iyang damgo nga moaway alang sa world title sunod tuig.

Sa supporting bout, si Rocky ‘The Road Warrior’ Fuentes (34-6, 22KOs) midepensa sa iyang OPBF flyweight title pinaagi sa unanimous decision batok ni Myung Ho Lee (15-2, 5KOs), samtang si Arthur ‘El Matador’ Villanueva (20-0, 12KOs) pabilin usab nga undefeated batok ni veteran Thai fighter Pramuansak Posuwan (45-5, 24KOs) pinaagi sa unanimous decision.