Martinez tumba, apan daog

CEBU, Philippines - Sama sa gilauman, nahimong kulbahinam ug duguon ang sangka tali sa duha ka hari sa middleweight division, apan mipatigbabaw gihapon sa katapusan ang Argentinean nga si Sergio Martinez human niya nailog ang WBC title gikan ni Julio Cesar Chavez Jr. pinaagi sa unanimous decision didto sa Thomas and Mack Center sa Las Vegas.

Gamit ang iyang kapaspas ug kasinatian, gidominaran ni Martinez ang tibuok onse ka rounds, apan wa damha nga madisgrasya siya dihang naigo siya sa makabungog nga hook ni Chavez nga mipatumba kaniya sa round 12.

Nagsalimuang pagsagang si Martinez sa mga bangis nga atake ni Chavez ug nakahimo pa kini paglahutay hangtud sa katapusang bagting sa kampanilya aron makuha ang daog.

Ang tulo ka mga hurado sa away mihatag og 118-109, 118-109 ug 117-110 tanan pabor ngadto sa Argentinean boxing champion.

Si Martinez mipalambo sa iyang rekord ngadto sa 50-2, 28KOs, samtang si Chavez nakahiagum sa labing una niyang kapildehan sud sa 48 ka away.

Sa maong kadaugan usab, posible nga malabwan na ni Martinez sa world pound-for-pound ranking ang iyang gisundan nga si Manny Pacquiao kinsa kasamtangang nagkupot sa ikaduhang dapit.

Mismo ang trainer ni Chavez nga si Freddie Roach ang miangkon nga lupig sa istilo ug kapaspas ang iyang batos, apan mirasun usab siya nga dugay nakapakita sa iyang kusug ang iyang batos nga mao untay mamahimong yawi sa ilang kadaugan.

Si Martinez miangkon nga wa siya magdahum nga mapatumba sa katapusang round ni Chavez ug iya usab dayun nga gidawat ang posibilidad sa usa ka rematch nga maoy gisinggit sa mga boxing fans.