Cesafi Stars vs. Petron

CEBU, Philippines - Primera-klaseng basketball action ang molingaw sa Cebuano basketball fans sa dihang ang Cebu Schools Athletic Foundation Inc. (CESAFI) Selection makigsangka sa bisitang PBA team Petron Blaze Boosters nga maoy molamas karong adlawa sa CESAFI All-Star Games diha sa Cebu Coliseum.

Masentro sa CESAFI All-Star ug Petron game mao ang 6-foot-9 center sa University of Cebu (UC) Webmasters nga si June Mar Fajardo, kinsa mopakita'g aksiyon sa unang higayon isip pro.

Ang garbo sa Pinamungajan nga si Fajardo, bag-o lang mikulit sa iyang pangan isip unang Sugbuanong basketbolista nga nahimong No. 1 overall sa PBA Draft. Ang duwa niya karon maoy barometro kun unsa siya kaandam alang sa pro-league.

Si Fajardo moduwa uban nilang Chico Lanete, Arwind Santos, Danny Ildefonso, Dorian Peña, Chris Lutz, Marcio Lassiter, Alex Cabagnot, Dennis Miranda, Joseph Yeo, Paolo Hubalde, Axel Doruello, RJ Rizada ug Jojo Duncil.

Samtang ang CESAFI All-Star ni coach Felix 'Donbel' Belano sa UV Green Lancers langkuban ni Jhon Michael Abad, Eman Calo, Phil Mercader, 6-foot-7 Nigerian recruit Steve Cedrick Akomo, Hernal 'Wowie' Escosio, Jerome Silva ug Rene Saycon gikan sa UV, Abulaiz Suliman ug Miguel Tabaloc sa USJ-R, Monbert Arong ug 6-foot-6 Cameroonian nga si Justin Aboude sa  SWU, Quinton Brian Heruela sa USC, June Michael Cantonao sa USC, Allan Dimco sa CIT-U ug Joseph Sedurifa sa USPF.

Ang tinuig nga pasundayag sugdan sa ala-1 sa hapon nga naglatid sa duwa tali sa North ug South All-Star sa juniors division.

Himuon sab ang Slam Dunk contest ug 3-point shootout. (BANAT NEWS)