CSC-7 mopasiugda'g fun run

CEBU, Philippines – Ang Civil Service Commission (CSC) 7 mopahigayon og First CSC Region 7 Fun Run for Better Public Service karong Sabado (Septiyembre 8) didto sa Central Command, sa Camp Lapu-Lapu sa Salinas Drive, Lahug ning siyudad.

Kabahin kini sa pagsaulog sa ika-112th nga anibersaryo sa CSC karong bulana.

Uban sa tema "Kawani, Ikaw ay Isang Lingkod Bayan," ang lumba giabagan sab sa Cebu City Government, Municipality of Daanbantayan, Bureau of Fire Protection ug private partners.

Matud pa ni Nissi Cherith Asis, ang pangulo sa CSC-Cebu South Field Office nga ang maong fun run gitunga sa duha ka kategoriya 5K ug 3K open.

Aduna kini registration fee nga P300 libre na ang singlets ug P150 niadtong runners nga dili gusto og singlets.

Sumala pa ni Asis nga   makakuha og diskwento ang mga kawani sa gobiyerno ug ingon man mga tinun-an. Kinahanglan nga makapresentar kini sa ilang ID atol sa rehistrasyon.

Ganting salapi ang madawat sa top three winners sa matag kategoriya. Ang kampiyon sa 5K mobulsa og P2,000, ang second ug third placers makadawat og P1,000 ug P700 matag usa. Samtang sa 3K category, ang kampiyon makaangkon og P1,500, ang second placer makadawat og P1,000 ug ang third placer mobulsa og P500. BANAT SPORTS