Giharus sa UV, 6-0

CEBU, Philippines - Walay depensa nga misaler batok sa mga big men sa University of the Visayas (UV) Green Lancers ilabi na ngadto kang muscleman Hernal "Wowie" Escocio kinsa nagbahis sa ilawom aron moburak og 23 puntos ug gibaswat ang iyang team ngadto sa 95-85 nga kadaugan batok sa higpit nga karibal ang Southwestern University (SWU) Cobras kaniadtong Domingo atol sa nagpadayong 12th season sa Cebu Schools Athletic Foundation, Inc. (CESAFI) didto sa Cebu Coliseum.

Kauban kang 6'7 Nigerian import Steve Cedrick Akomo, si Escocio maoy mitimon sa Lancers aron sayong dominahon ang duwa ug milabaw dayo'g 10 puntos, 24-14 human sa first period ug niadtong tungora, silang duha lang ni Benoit Mbala ug Justin Aboude ang naka-iskor sa unang napulo ka minutos---otso puntos kang Mbala ug sayis puntos kang Aboude hinungdan nga dali ra kaayong nabasahan sa Lancers ang opensa sa nauwahi.

Dihang nakaamot na sa puntos ang uban players sa Cobras didto sa second period, nakuha nila sa hinay-hinay ang labaw, 27-26 pinaagi sa jumpshot ni Merbien Dedace.

Wala mag-usik og panahon ang Lancers ug misumbalik dayon aron mag-mentenar og double-digit lead sa makadaghang higayon lakip niini ang 47-35 nga labaw sa halftime ug 84-73 nga labaw sa kataposang kuwatro minutos sa duwa.

Dibuynas kaayo ang Cobra gunner nga si Monbert Arong kinsa nagmangtas didto sa final quarter apan wala kadto makapiog sa Lancers tungod kay gawas kanilang Escocio ug Akomo, nakatabang sab sa opensa ang ubang big men ug ingon man ang beteranong sila si Jerome Silva, Phil Mercader ug Eman Calo aron molampos pagkulit og 6-0 sweep.

Dugaydugay pa nga pahuway ang matagamtaman sa Lancers tungod kay adto na sila balik sa semifinals isip no. 1 qualifier ug ang ubang unom ka teams magbagat pag-usab sa playoffs aron pagsuta sa opisyal nga placings atol sa final four.

Malipayon man tuod ang Lancers coach nga si Felix "Donbel" Belano sa ilang kalamposan pagharus sa elimination apan matod pa niya wala siya mokuntento tungod kay aduna pa siya'y nakit-an nga mga lapses nga angayan korehean samtang wala pa sila'y duwa.

Wala na lang gani pasudla ni coach Belano si Akomo sa kinatibuk-ang fourth period tungod sa foul trouble apan nakahimo gihapon siya'g 11 puntos. Si Silva midugang og 16 puntos ug si Calo miamot og 12 puntos.

Si Arong maoy nangu sa 2-3 nga Cobras sa iyang 24 puntos. Sa miaging tuig, nakasinati sab og 3-3 nga baraha ang Cobras apan naka-abante lang gihapon sila sa finals.

Aduna pa sila'y usa ka duwa nga nahibilin ug kini batok sa University of San Carlos (USC) Warriors karong Huwebes didto sa USC gym sa dan Sanciangko, ning dakbayan.

Sa mga duwa sa high school, gimakmak sa Sacred Heart School-Ateneo de Cebu Magis Eagles ang USC Baby Warriors, 88-56 samtang midaug ang Cebu Institute of Technology-University (CIT-U) Baby Wildcats batok sa University of Southern Philippines Foundation (USPF) Baby Panthers, 78-70.

Sa sayo pa, naka-ipsot ang Cebu Eastern College (CEC) Dragons batok sa UC Junior Webmasters, 66-63.

    Puntos matag usa:

UV (Coll.) 95 —      Escocio 23, Silva 16, Calo 12, Akomo 11, Mercader 9, Abad 6, Octobre 5, Mendoza 4, Saycon 4, Perolino 3, Avillanoza 2

SWU (Coll.) 86 —  Arong 24, Mbala 18, Nalos 11, Aboude 10, Dedace 8, Goloran 7, Casquejo 4, Bregondo 4 Halftime: 47-35.