Thai kusog og kumo

CEBU, Philippines - Mideklarar dayon og gira ang Thai boxer nga si Pungluang Sor Singyu ngadto ni ALA Gym superstar AJ ‘Bazooka’ Banal alang sa ilang sangka sa main event sa ‘Pinoy Pride XVII’ sa Oktobre 20 didto sa SM Mall of Asia Arena sa Pasay City.

Sila si Banal ug Pungluang kinsa mag-ilog sa bakanteng WBO bantamweight title, nagkita ug naghimamat sa labing unang higayun atol sa press launching sa maong dakung fight card kagahapon didto sa Café UNO sa Waterfront Cebu City Hotel.

Atol sa maong press conference, ang 24-anyos nga si Pungluang kampanti kaayong miingon nga mas nakabentaha siya ni Banal tungod kay nagbaton siya og mas kusug nga kumo ug masaligon siya nga mapatumba ang Pinoy boxer.

“He is a strong fighter and has a good technique, but my punch is stronger than him, I am going to beat him” matud pa ni Pungluang kinsa nailhan usab nga usa ka ‘Filipino Executioner’ tungod sa 14 ka mga Pinoy boxers nga iyang gipangpilde.

Ang Thai mipadayag usab nga wala siya mahadlok nga moaway sa balwarte ni Banal, apan iyang paninguhaon nga dominante ang iyang kadaugan aron malikayan ang gikabalak-an niyang ‘hometown decision’.

Sa iyang bahin, si Banal kalmado lang bisan pa sa mga bahad ni Pungluang ug iyang giklaro nga dili niya usikan ang dakung kahigayunan nga matuman ang iyang damgo nga mahimong world champion.

“Nag-ensayo ko og maayo tungod kay gusto gyud ko nga ma-world champion ug kun moingon siya (Pungluang) nga iya kung tumbahon, ako sad siyang tumbahon,” matud pa niya.

Si Pungluang adunay impresibong record nga 42-1, 27KOs, samtang si Banal mobandera sa iyang 28-1 win-loss record uban ang 20 ka knockouts.