17th MLO Visayas elims mosikad karon

CEBU, Philippines - Mosikad karon adlawa ang gipaabot nga 17th Milo Little Olympics-Visayas leg karong hapon diha sa Cebu City Sports Center (CCSC).

Kapin sa 7,000 ka mga atleta, coaches ug officials ang muhugop karon sa track oval sa CCSC alang sa pagbukas sa usa sa labing dakung sporting events nga mahitabo karong tuiga sa Sugbo.

Moabot sa 114 ka tunghaan nga pangulohan sa perennial champion University of Cebu (UC) ang magtigi sa secondary division, samtang 111 nga pangulohan usab sa defending title-holder University of San Carlos-Basic Education (USC-BED) ang musalmot sa kompetisyon sa elementary level.

Sa dili pa ang pormal nga kompetisyon, usa ka opening ceremony ang mahitabo karon diin ang host mao ang Abellana National School (ANS) nga mopasundayag og dance number ubos sa tema sa kampanya sa Department of Tourism nga “It's more fun in the Philippines”.

Mga sporting events nga tigian sa duha ka semana nga torneyo naglakip sa athletics, swimming, badminton, chess, gymnastics, lawn tennis, scrabble, sepak takraw, sipa, table tennis, taekwondo ug volleyball.

Ang mga mugawas nga top performers sa matag sporting events makadawat og medalya nga musunod sa points system.

Gawas sa kompetisyon, ang torneyo magsilbe nga preparasyon sa Regional VII-Team Bisdaks alang sa nagsingabot nilang title defense sa Milo National Olympics nga gitakda sa Oktobre didto sa Marikina City.   - BANAT NEWS