Jaca-Marquez rematch gipangusgan

CEBU, Philippines - Giablihan karon sa ALA Promotions ang posibilidad sa "rematch" tali ni Mexican boxing superstar Juan Manuel Marquez ug Jimrex Jaca dinhi sa Pilipinas.

Kini human sa eight-round knockout nga kadaugan ni Jaca batok sa Mehikanong si Angel Martinez niadtong Sabado sa gabii sa "Pinoy Pride XV" card didto sa Waterfront Cebu City Hotel and Casino.

Si ALA Promotions CEO Michael Aldeguer nagkanayon nga suwayan nila ang pakig-negosasyon sa kampo ni Marquez kun uyon ba kini nga sangkaon pag-usab si Jaca nga una na niyang gipilde atol sa WBO featherweight title fight unom ka tuig na ang milabay didto sa Texas.

"I heard that Marquez is looking for a southpaw to prepare himself for Pacquiao," matud pa ni Aldeguer. "So mosuway mi pakig-negotiate sa camp ni Marquez and we will also see if we could bring the fight here in the Philippines."

Ang kanhi two-time OPBF champion nga si Jaca mipadayag usab sa iyang kaandam nga makigsangka pag-usab ni Marquez.

"Mas kusgan ko ani nga timbang (140 lbs.) ug tan-aw nako anaa ko'y kusog ug abilidad nga moaway niya (Marquez) pag-usab," matud pa ni Jaca. "Kun mahinayon among rematch, mag-ensayo gyud ko og maayo tungod kay gusto usab ko makabawos niya." (BANAT SPORTS)