MJDL Customs 4-0 na's Abbariao Cup

CEBU, Philippines - Nakasagunson na'g upat ka daog ang MJDL Customs Brokerage pinaagi sa pagpilde sa Blue team ni District Collector Ronnie Silvestre, 66-61 sa Bureau of Customs 3rd Major Alfonso Abbariao Cup 2012 basketball tournament didto sa Basak San Nicolas gym, Cebu City.

Ang MJDL miposte sa labing daku nilang labaw nga 11 puntos, 47-36 pagsugod sa third quarter kortesiya nilang Jaymar Elloren, Elmer Cabaltera ug Janus Abellana. 

Nakasikit unta ang Blue sa final quarter dihang mitikdol og lima ka sunod-sunod nga three-pointers si Chito Manahan, 61-62 sa nahabiling 26 segundos, apan misukli ang MJDL og duha ka fastbreaks aron inaton ang labaw dayon pagposte og singko puntos nga kadaugan.

Silang Elloren ug Cabaltera   nagkumboya og 21 puntos aron pangulohan ang 4-0 nga MJDL, samtang ang Blue gipangulohan ni Manahan nga mihipos og 19 puntos lakip ang lima ka triples.

Sa sayo pa, ang Green nakaipsot batok sa Cebu International Port Users (CIPU), 87-85 alang sa ilang ikatulong daog.

Sa ikatulong higayon, si Noel Medalle mao na usab ang miluwas sa Green team pinaagi sa buzzer-beater jumpshot. 

Miiskor og 23 puntos si Medalle aron pangulohan ang Green, nakakuha sab siya og suporta gikan nilang Bryan Rabago, Lester Gabica ug Jan Mose .

PUNTOS MATAG USA

Unang duwa:

GREEN (87) - Medalle 23, Mose 11, Gabica 11, Rabago 11, Apuya 9, Sarmiento 9, Montenio 7, Cabrera 4, Alipante 2

CIPU (85) - Mondin 36, Manulat 20, Garcia 12, Allerite 6, Solidarius 4, Pangan 2, Carmen 2, Sugar 2, Morre 1

Ikaduhang duwa:

MJDL (66) - Elloren 11, Cabaltera 10, Jordan 8, Abellana 8, Lambayan 8, Trinidad 4, Acebo 4, Cortes 4, Chio 3, Cal 2, Claro 2

BLUE (61) - Manahan 19, Remonde 10, Viodor 8, Bacalla 7, Velarde 6, Camonayan 4, Gornez 3, Silvestre 2, Librando 2.   - BANAT NEWS