1st St. Augustine Fiesta Run for the Church gitakda sa Agosto 25

CEBU, Philippines - Pormal nga gilusad sa lungsod sa Carmen ang labing una nilang running event nga ulohan og "St. Augustine Fiesta Run for the Church" nga mosikad sa Agosto 25 didto sa plaza sa naasoy'ng lungsod.

Tipik lamang kini sa mga kalihukan alang sa tinuig nga kapistahan sa ilang mahal nga patron St. Augustine sa Agosto 28.

Isip fund-raising event, ang kita sa maong kalihukan adto ihapak sa nagpadayong renovation sa St. Augustine parish church.

"Aside from promoting a healthy lifestyle to our townfolk, we decided to organize this run to raise funds for the continuing renovation of the St. Augustine parish church," matud pa ni   race chairman ug municipal councilor Manuel Mari Durano atol sa news conference niadtong Domingo sa hapon didto sa Carmen municipal   session hall.

Mitambong usab sa conference si Mayor Martin Gerard T. Villamor, Vice Mayor Al Silvestre Damiles, SB member Jover B. Pisao ug pipila ka mga barangay kapitan sa maong lungsod ug mga sakop sa Carmen-Cebu Runners Club.

Gilauman sa organizers nga moabot sa 500 ka runners gikan sa Carmen ug sa kasikbit nga mga lungsod ang moapil sa lumba nga gibahin nga naglatid 5K open, 3K Carmen residence ug 3K Carmen residence (40-year and above).

Sa entry fee nga P250, ang registrant makadawat na og singlet ug post-race refreshments.

Mahimong magparehistro sa Carmen municipal hall ug sa Cebu City Sports Center (CCSC).

Ganting salapi ug medalya ang nagpaabot sa mga mananaog sa matag kategoriya.

Gipahibalo usab sa organizers nga adunay sakyanan nga mokuha sa mga runners gikan sa Sugbu paingon sa Carmen. Anha kini mag-abot sa CCSC sa alas-3:30 sa kaadlawon.

Gawas sa fun run, ang Carmen mopasiugda usab og airsoft competition didto sa reclamation area sa Agosto 18 ug 19, basketball exhibition tali sa Manila Celebrities ug Mayor's Stallions sa Agosto 21 ug Horseshow & Carabao Race sa Agosto 25. (BANAT SPORTS)