12th CESAFI buksan na

CEBU, Philippines - Usa ka adlaw human gibuksan ang 2012 London Olympics, sugdan na usab ang dakung kalihukan sa paugnat sa kusog dinhi sa Sugbu karong adlawa.

Mga banggiitan ug masidlakon nga mga magduduwa sa Cebu Schools Athletic Foundation Inc. (CESAFI) ang mag-abot karon sa pagbukas sa 12th CESAFI men's basketball event diha sa Cebu Coliseum.

Ang basketball legend nga si Julian Macoy, ang labing edaran nga coach sa kasaysayan sa CESAFI, mosuway og giya sa iyang kanhi team University of San Carlos (USC) Warriors pagkulit og daog sa una nilang duwa batok sa University of San Jose-Recoletos (USJ-R) Jaguars sa main game nga gitakda sa alas-6 sa gabii.

Ang ilang manghod nga USC Baby Warriors ug ang USJ-R Baby Jaguars maoy magsangka alang sa preliminary sa alas-4:30 sa hapon.

Sa dili pa ang duwa, usa ka engrande ug mabulokong opening ceremony ang ipahigayon diin ipasundayag ang cultural dances o "palabas” gikan sa mga CESAFI member schools ug ang pagpili og "Ms. CESAFI 2012." 

Adunay pito ka teams ang mopakita'g aksiyon sa collegiate division nga gipangulohan sa defending champion University of Cebu (UC) Webmasters ug siyam ka secondary division nga pangulohan sa defending champion University of the Visayas (UV) Baby Lancers.

Sa iyang coaching debut, si Macoy makasugat og bug-at nga tahas kay aduna lamang siya'y upat ka karaang players nga nahabilin sa miaging tuig nga line-up nga sila si June Michael Cantonao, Nilton John Otida, Chino Uy ug Dominic Adlawan.

Sa laing bahin, ang Jaguars ni coach Edito Salacut mas daghan og karaan sama nilang Jason Olbedado, Abulaiz Suliman, Renato Abing, Banjo Capillar, Medjet dela Rama ug Wilkins Sanchez.  (BANAT SPORTS)