Pacquiao nakiramay sa pamilya ni Dolphy

MANILA, Philippines - Imbes na pag-usapan ang kanyang susunod na laban ay mas pinili ni Manny Pacquiao na makiramay sa pamilya ng namayapang si Comedy King Dolphy.

“Condolence sa pamilya niya. Ipag-pray natin siya,” sabi ni Pacquiao ma­ka­raang dumating sa bansa kahapon ng madaling-araw makaraan ang pag­ba­­bakasyon sa United States kasama ang kanyang asawang si Jinkee.

Naiwan pa sa US ang kanilang mga anak.

Lumapag ang Philippine Airlines flight (PR-103) sa Ninoy Aquino International Air­port ganap na alas-5:55 ng madaling-araw sakay sina Pacquiao.

Ayon kay Pacquiao, karapat-dapat na ituring si Dolphy bilang National Artist.

“Deserving naman talaga siya sa award,” wika ni Pacquiao.

Nagmula si Pacquiao sa isang kontro­bersyal na split decision loss kay Timothy Bradley, Jr. kung saan na­agaw sa kanya ng American fighter ang hawak niyang World Boxing Orga­nization (WBO) welterweight crown no­ong Hunyo 9 sa MGM Grand sa Las Ve­gas, Nevada.

Sa kabila naman ng rematch clause sa kanilang fight contract, wala pa ring de­sisyon ang 33-anyos na si Pacquiao kung muling haharapin ang 28-anyos na si Bradley.

Binitawan ni Bradley ang dating suot na WBO light welterweight belt para idepensa ang welterweight title sa kanilang re­match ni Pacquiao sa Nobyembre 10.

Handa naman si Bradley (29-0-0, 12 KOs) sa kanilang rematch ni Pacquiao (54-4-2, 38 KOs) para mapatunayan na si­ya talaga ang nanalo sa kanilang laban no­ong Hunyo 9.

Kung hindi matutuloy ang Pacquiao-Brad­ley rematch ay nasa listahan ni Arum ang 38-anyos na si Juan Manuel Marquez pa­ra sa kanilang ikaapat na laban ni ‘Pacman’.