Kausaban ni Pacquiao

Nakatawa ko sa kausaban ni Manny Pacquiao sa iyang media interviews didto sa Wild Card Gym.

Daw gikuyawan ko nga basin masobrahan unya siya pagkamanggiluloy-on kang si Timothy Bradley Jr. sa ilang away karong Hunyo 9 (petsa 10 sa Pilipinas) didto sa Las Vegas, Nevada.

Samtang si Bradley nangugat og pasiatab nga iyang pakamangon si Pacquiao atol unya sa ilang away, apan ang Pinoy boxing superstar, kinsa mipalig-on pa sa iyang pakigrelasyon sa Kahitas-an igo lang mitubag nga iya i-ampo ang American fighter.

Isip usa ka boksidor mura'g dili maayong paminawon sa mga fans ang mga susamang pamahayag sa hagit sa kaatbang.

Tinuod nag-usab na si Pacquiao (base sa iyang pangangkon) itandi sa kun si kinsa kaniadto dihang nagsugod pa siya og kasikat, apan lahi ra gyud kun ang tubag sa hagit usa usab ka hagit gikan kaniya.

* * *

Ang matag makaatbang ni Pacquiao kanunay gyud mahimong "underdog" o menos kaayo. Sa lugar ni Bradley nga mao karo'y WBO undefeated junior welterweight champion ug wala pay pilde, lisud dawatong siya "underdog" uy.

Ang mga nangaging mga kontra ni Pacquiao pulos dunay pangalan sama nila ni Oscar dela Hoya, Shane Mosley, Miguel Cotto, Antonio Margarito, Juan Manuel Marquez, Ricky Hatton nga maoy nakapasikat kaniya'g maayo.

Ang mga mosunod pa unyang makaatbang ni Pacquiao kun siya gihapon ang modaog batok kang Bradley susama gihapon og taakong bukid. Tungod kay una pa nila aktuwal nga makaatbang sa ring si Pacquiao, kinahanglang malupigan una nila ang psychological effect sa pagtawag kanilang "underdog."

Ang preparasyong pisikal ug ang aktuwal nilang game plan kinahanglan haom sab nga iparang kang Pacquiao, kinsa matud pa sa nakatilaw niya sa ring, lisud pugngan.

Hinuon, si Bradley sa iyang bahin karon mentally and physically prepared na man daw siya og excited na gyud siyang makita si Pacquiao nga mokamang sa canvass.

* * *

Mentally, seguro tinud-anay nga andam na siya bisan gitawag siyang underdog. Matud pa niya lahi ra kaayo siya sa uban kay sila estorya ra'y gadaghan, apan ang tseke ray giapas.

Si Bradley, batan-on ug uhaw sa kasikatan, ug dako ang pagtuo ug pagsalig nga kaya niyang pamatud-an ang iyang pangangkon nga pildihon ang Pinoy (dili daw tseke). Tan-awon bitaw nato.

Wala na'y kuwestyon pa ra kanako kun kayahon ni Pacquiao si Bradley, tungod kay nagtuo ko nga lamyon ni Bradley ang tanan niyang pagpanghagit kang Pacquiao.

Niadtong Abril 2009 makaduha ka higayon nga natumba si Bradley batok ni Kendan Holt, apan nakabangon siya ug nakuha niya ang unanimous decision nga kadaugan. Ug daku ang pagtuo ni Bradley nga mahimo niya kini kang Pacquiao.

Daku kaayo og deperensya sa knockout power si Holt ug si Pacquioa. Basin diay mas hinay si Pacquiao og kumo itandi kang Holt.

* * *

PAGTULON-AN: Mas maayo pang may usa ka atletang nagpuyong may disiplina ug may sportsmanship nungka sa gatosan ka atletang pulos tikasan.

GREETINGS: Happy birthday Bro. William Tiu.

Email: [email protected]