Prime Asia-UV Lancers, 3-0 na sa 6th Partner's Cup

CEBU, Philippines - Mibugwak og 25 puntos ang higanteng si Hernan 'Wowie' Escocio lakip na ang iyang bangis nga slamdunk sa katapusang 30 segundos aron pangulohan ang Prime Asia-UV Lancers paglansang og 101-94 nga kadaugan batok sa KIA Motors-CIT-U Wildcats 6th CESAFI Partner's Cup kagahapon didto sa Cebu Coliseum.

Ang 19 puntos ni Escocio sa fourth quarter nakatabang sa Prime Asia pagprotehir sa ilang nipis nga labaw nga kanunay'ng hulgaon sa KIA, kinsa misikit og kuwatro puntos, 91-95 sa nahabiling 35 segundos sa three-pointer ni Allan Dimco, apan didto ra kutob ang ilang mga paningkamot kay ang Prime Asia miposa sa katapusang unom ka puntos sa duwa.

Si Escocio nakigtimbang sa mga beteranong guwardiya nga sila si Phil Mercader ug Eman Calo aron mohimo og fastbreak points diin nagkumboya sila og 15 puntos.

Sila si John Michael Abad, Rene Jun Saycon ug Chris Perolino mihirit og 10 puntos alang sa Prime Asia, kinsa temporaryong nagsolo sa standings bitbit ang 3-0 nga baraha.

Si Floyd Taboada maoy nangu sa KIA Motors nga miratsada og 15 puntos, samtang si Dimco miarangkada og 12 puntos. Sila si Vincent Menguito ug Axel Rabaya parehong miiskor og 10 puntos alang sa KIA Motors nga adunay balanseng 1-1 nga baraha. (Uban ni Gabby G. Malagar) (BANAT SPORTS)