12 PBA players pumirma ng commitment leter sa Gilas II
MANILA, Philippines - Isang ‘commitment letter’ ang pinirmahan ng 12 PBA players sa kanilang pagkakabilang sa Smart Gilas Pilipinas II ng Samahang Basketbol ng Pilipinas (SBP).
Ang mga ito ay sina Jimmy Alapag, Jason Castro, Ryan Reyes, Ranidel de Ocampo at Kelly Williams ng Talk ‘N Text, Gary David ng Powerade, Gabe Norwood ng Rain or Shine, Enrico Villanueva ng Barangay Ginebra at LA Tenorio at Sonny Thoss ng Alaska.
Bagamat hindi nakapirma sa nasabing ‘commitment letter’, nangako naman si Powerade rookie Fil-Am Marcio Lassiter na sasama sa national pool bago siya umuwi sa United States.
Wala pang desisyon ang San Miguel Corporation kung pasasamahin sa koponan na hahawakan ni coach Chot Reyes sina James Yap at Marc Pingris ng B-Meg at Alex Cabagnot at Arwind Santos ng Petron Blaze.
Paghahandaan ng Smart Gilas II ang paglahok sa 2013 FIBA-Asia Championships na siyang magiging Asian qualifier para sa 2014 FIBA World Cup sa Spain.
“As a national pool player, I further commit to devote my full time and effort to Smart Gilas in the off-season, even if it means sacrificing my rest and vacation periods, from now until the FIBA Asia Championship in 2013 and even possibly the FIBA World Championship in 2013,” nakasaad sa naturang ‘commitment letter’.
Ang Smart Gilas II ay gagabayan ni naturalized player Marcus Douthit habang nilalakad pa ang naturalization papers ni NBA center JaVale McGee.
Bukod sa mga professional players, magtatayo din si Reyes ng isang cadet pool na kabibilangan ng pinakamagagaling na amateur at collegiate cagers sa bansa.
- Latest
- Trending
