Japanese world champ nag-train sa Wakee Gym

CEBU, Philippines - Ang nabantog ug tinahod nga Kameda brothers sa Japan nga sila si Koki ug Daiki mituyo pag-anhi sa Sugbu aron mag-ensayo sud sa upat ka semana sa RWS Gym ni Cebuano promoter Rex 'Wakee' Salud.

Uban sa managsuong Kameda mao ang ilang trainer ug amahan nga si Shiro Kameda.

Ang RWS Gym nga nahimutang sa barangay Punta Princesa mao sab ang gym triningan ni pound-for-pound king Manny Pacquiao dihang nangandam siya alang sa iyang   "rematch" uban ni Marco Antonio Barrera niadtong 2007 didto sa Mandalay Bay Resort and Casino sa Las Vegas.

Sa maong rematch, si Pacquiao mao gihapon ang mipatigbabaw pinaagi sa "unanimous decision."

"Basin og aduna sila'y nadunggan nga nindot sa Wakee Gym mao nang diri sila nag-train," matud ni Jun Ablaca, trainer sa Wakee Gym.

Si Koki (27-1, 1KOs) mao ang reigning WBA bantamweight champion, samtang si Daiki (22-3, 14KOs) usa ka former world flyweight titlist.

Ang duha ka protagonista pulos adunay gipaabot nga dagkung sangka karong tuiga. Si Koki modepensa sa iyang bakus batok ni Indonesian challenger Noulde Manakane sa Abril 4 didto sa Japan, samtang ang manghod nga si Daiki moaway ni Thai Pompetch Twins Gym sa usa ka non-title bout.

Si Koki nakig-spar usab ni Rodel 'Batang Mandaue' Mayol, kinsa nangandam alang sa iyang WBA flyweight title showdown batok ni Hernan Marquez sa Marso 24 didto sa Mexico.  - BANAT NEWS