Ilad nga nasakpan

Pastilan! Bisan pa man sa ka propesyonal na karon sa boksing, apan aduna gihapoy mga tawong manurambaw!

Tiaw mo nang hasta ang makaatbang ni IBF International featherweight champion Rey 'Boom Boom' Bautista nga usa ka Mehikano dili diay mao ang naa sa huna-huna sa iyang kampo nga makaatbang sa taga-Bohol.

Kagabii gihimo ang "Pinoy Pride XII: Bakbakan sa Bohol" didto sa Carlos P. Garcia Sports Complex sa Tagbilaran City, apan sa atong nadunggan daw awtomatikong nalibre ang mga fans ug mga paisano ni Boom Boom sa pagtan-aw.

Basi sa atong nadawat nga mga impormasyon daw nailad ang ALA-Promotions sa nahitabo kay imbes nga si Genaro 'Poblanito' Garcia nga may rekord nga 37-8-21KOs ang ikaatbang sa ilang batos, laing Genaro Garcia ang mitungha nga may ‘nihit’ kaayong rekord nga 10-11 ug 6 KOs.

Ang Garcia nga gikasangka ni Boom Boom mao si Genaro 'Panterita' Garcia, kinsa mas daku ug bug-at itandi kang 'Poblanito.' Hinuon kini matawag nalang nato nga "charge to experience" sa habig sa atong local promoters. Wala hinuon ta masayod kun duna bay legal nga lakang nga buhaton ang ALA Promotions batok sa Mexican matchmaker nga si Hugo Correa kay atong tan-awon og maayo daku na og nagasto ang promotional side dinhi. Gani duna pay report nga mismong si Garcia miingon nga dili siya ang naa sa hulagway nga naa sa promotional posters.

* * *

Maayo na lang nga nabantayan dayon kay kun dili pa siguradong sawayon ang promoter sa maong sangka ug mapasanginlang ‘nangilad.’ Hinuon nailad man gyud ang promosyon ani, nailad usab og kadiyot ang media ug ang mismong mga boxing fans aning hitaboa. Wala siguroy sala si Garcia niining hitaboa, kay kompleto man siya sa dokumento pag-anhi ug andam sa kumbati.

Atol ning pagsulat, wala pa magsugod ang away. Apan sigurado ko nga samtang gibasa ninyo kini i-replay ang duwa pinaagi sa ABS-CBN channel karong buntag. So, atangan nalang nato. Di ko buot nga unhan ang wala pa masayod sa resulta sa sangka.

* * *

Nakadayeg ko og maayo sa labok sa atong Philippine Azkals atol sa ilang sangka batok sa South East Asia powerhouse nga Malaysia ning semanaha bisan nagtabla ang ilang duwa, 1-1 all. Kini dili kay nakatabla kita, kun dili ang taktikang gipatuman ni coach Michael Weiss batok sa Malaysian Tigers.

Sukwahi sa nangaging mga duwa sa Azkals sa uwahing Middle East friendlies nila sa nakalabay’ng bulan higpit kaayo ang defensive line sa Azkals ilabi na duol sa penalty box. Kaniadto duha o tulo ka defenders ug ang goalkeeper lang maoy magkapuliki og depensa maong daling makakita og buslot ang mga kaatbang. Apan sa duwa sa Azkals batok sa Malaysia makita ang kahugot sa depensa sa mga Pinoy tungod kay hapit nalang mahuman ang 90 minutos sa duwa wala pa makaiskor ang mga Malaysian.

Nakatabla ang mga dayo tungod sa naghinobrang kompiyansa o ba kaha opensa sa Azkals pagdasdas sa goal sa mga Malaysian maong dihang na-intercept ang bola wala dayon makabalik sa depensa ang mga Pinoy ug ang nahibilin mao ang pipila lang ka defenders tabang kang Neil Etheridge. Samtang dunay bati kaayo karong nahitabo sa Azkals tungod kay si Lexton Moy ug Angel Guirado gipasanginlan man nga nagbinastos sa kanhi Philippine Olympic Committee (POC) president Cristy Ramos, kinsa pre-inspection atol sa maong duwa niadtong Miyerkules.

Ang Azkals atua karon sa Katmandhu, Nepal alang sa 2012 AFC Challenge Cup.

* * *

PAGTULON-AN: Mananom kita dili para sa ato, kay ang bungang atong gikaon karon gikan sa lisong gitanom sa atong katiguwangan.

[email protected]