Deciding factor
Plansado na gyud ang away sa atong Pambansang Kamao nga si Manny 'Pacman' Pacquiao batok sa wala pay pildeng American lightwelterweight champion nga si Timothy Bradley karong Hunyo 9 sa MGM Grand Las Vegas.
Alang nako, kining awaya bisan mianunsyo nang dili kini maoy katapusan nang pagsaka sa ring ni Pacquiao, ‘deciding factor’ gyud ang performance unya sa Pambansang Kamao. Pinaagi sa performance niya karong Hunyo 9 mabanabana gyud sa boxing fans kun angayan na bang ibitay ni Pacquiao ang iyang boxing gloves.
* * *
Matud pa sa mga nanggawas nga balita nakaamgo na si Pacquiao sa pag-underestimate niya sa uwahi niyang gikasangka nga gikonsiderar nga iyang arch-nemesis sa ibabaw sa ring nga si Juan Manuel Marquez nga bisan iyang napilde milanat gihapon kini og 12 ka rounds sama sa nahauna nilang duha ka mga sangka.
Mas maayo kun tinuod ni nga pangangkon ni Pacquiao, kay mas maayong magpaubos nungkang ikaw ang naa sa ibabaw unya maglisud og apas sa pagdepensa sa imong gipanghambog ini'g abot unya sa panahon.
Samtang si Bradley sa mga nanggawas nga report mipasidaan nga dili sama lang sa tigluwas sa bati nga nangaging rekord ni Pacquiao, kinsa naglisud pagtumba nilang Shane Mosley, Antonio Margarito, Joshua Clottey ug ni Juan Manuel Marquez.
* * *
Kun sa barog, dili kaayo biya si Bradley, sa estilo dili sab kabintahaan, sa lahutay nakita naman sab nga durabli kini sa iyang nangaging mga sangka. Apan anhi ni daugon sa gibug-aton sa kinumo.
Si Pacquiao adunay rekord nga 54-3-2,38KOs. Si Bradley, 28-0,12KOs. Kamo nalay hukom kun asa kanila ang nakabentaha.
Apan ang sigurado ang duha pulos gyud mag-ensayo og maayo. Si Pacquiao mianunsyong 10 ka semana ang iyang himuong pagpangandam. Ang ako ani basin og si Bradley magpadaku sad og lawas bisan kaparang lang ni Marquez ning uwahi ug dili maapektahan ang iyang estilo.
* * *
Kun magkalisud pa gani ni karon si Pacquiao kang Bradley siguro panahon na nga moretiro siya sa pamuksing with or without Floyd Mayweather Jr. superfight. Mas mobarato si Pacquiao kun matapos ang sangka nga bati ang ‘finishing.’
Kun dili ma-KO si Bradley bisan mapilde man, dili kini makahatag og dakung epekto sa boxing career niini kay ang gikonsiderar nga number one pound-for-pound king man ang iyang nakaharong.
Apan sa habig ni Pacquiao, bisan modaog pa siya pinaagi sa decision (which is sure na gyud kun volume of punches maoy hisgutan) madugang lang kini sa dakung question mark kun angayan pa ba siya sa P4P title.
* * *
PAGTULON-AN: Ang mga kahoy, suba, kadagatan ug kalangitan dugay nang nakig-estorya kanato, apan wala gyud nato kini paminawa.
- Latest
- Trending
