3rd San Roque 9 Aside tourney gitakda

CEBU, Philippines - May nagpaabot na sab nga torneyo ang mahiligon moduwa og soccer kay ang San Roque Football Club (SRFC) sa pakig-alayon sa Queen City United FC mopahigayon og 3rd San Roque 9 Aside Tournament karong Pebrero 25 didto sa San Roque Parish field sa Brgy. Subangdaku, Mandaue City.

Ang duha ka adlaw nga torneyo nga molungtad hangtod sa Marso 4 naglatid sa players 9 ug 12, boys 15-under, boys and girls 17-under, 36-above, 40-above, inter-company ug men's open categories.

Aduna kini registration fee nga P1,500 matag koponan alang sa 36-above hangtod sa men's open division ug P800 alang sa age-groupers. Ang registration ipaagi sa first-come-first-served basis.

Ang torneyo mosubay og festival-type format diin ang contending teams bahin-bahinon ngadto sa brackets. Ang top qualifiers moharong sa no. 2 squads sa crossover semifinals diin ang mga mananaog magsangka alang sa kampiyonato.

Alang sa mga dugang detalye kalabot sa maong torneyo, mahimong mokontak ni tournament director Engr. Nilo Ferraren sa 0922-8899443 o di ba ni match consultant Sherwin Rodriguez sa 0922-2084405.  (BANAT SPORTS)