Little Azkals milangkat sa boys 14 title

CEBU, Philippines - Mipakita dayon sa ilang labok ang Little Azkals sa ilang unang torneyo ning tuiga human nila gipilde ang Sacred Heart-Ateneo de Cebu, (SHS-AdC) pinaagi sa penalty shootout, 3-2 aron langkaton ang boys 14 title sa 9th Thirsty Football Cup kagahapon didto sa San Roque Parish field sa Brgy. Subangdaku sa Mandaue City.

Ang Little Azkals mihimo og daghang mga pagsuway, apan mapakgang kini sa goal keeper sa SHS-AdC hinungdan nga nagtablang walay iskor ang duha ka kampo paghuman sa regulasyon.

Sa shootout, ang Little Azkals ug SHS-AdC parehong nakahimo sa ilang unang goal kortesiya ni Javier Romero-Salas ug Mark Veloso.

Human misipyat silang JB Borlongan ug Jun Canlas sa ilang turno, si Jed Diamante miiskor alang sa Little Azkals ug ingon man si Bernaldez alang sa SHS-AdC nga miresulta sa panagtabla, 2-2.

Nahimong kulbahinam ang duwa hangtod nga si Josh Miller   naka-goal nga nakapadaog sa Little Azkals.

Sa laing duwa, ang Foundation University sa Dumaguete milangkat sa boys 12 title human gipulbos ang Bright Academy-Red, 2-0.

Didto sa University of San Carlos-Technological Center (USC-TC) field sa Talamban, ang Olles Football Club sa Bukidnon maoy naghari sa players 6 division pinaagi sa pagpilde sa Centre for International Education-Tacloban, samtang ang Barili mibuntog sa bisitang Masbate team aron maghari sa players 8 division.

Sa pikas bahin, ang Subangdaku FC milangkat sa korona sa girls 14 division human gipilde ang San Roque FC, samtang ang SHS-AdC nidominar sa girls 17 dihang ilang gipukan ang St. Theresa's College (STC). (BANAT SPORTS)