SHS-AdC miangkon sa Game-1

CEBU, Philippines - Gidominar na sab sa Sacred Heart School-Ateneo de Cebu (SHS-AdC) Magis Eagles ang duwa batok sa Cebu Eastern College (CEC) Dragons, 68-51 aron angkonon ang Game-1 sa ilang "best-of-three"   finals series sa Seaoil National Basketball Training Center (NBTC) Elite League kagahapon didto sa City Sports Club-Cebu (CSCC) gym sa Cebu Business Park.

Tinguha karon sa Magis Eagles ang pagkulit og 2-0 sweep sa Game-2 karong alas-6 sa gabii didto gihapon sa CSCC.

Sila si Henry Renzar Asilum, Maverick Suarez ug Patrick Go pulos mibahog og double figures alang sa Magis Eagles, kinsa nilabaw og 15 puntos sa third period, 50-35.

Si Asilum miburak og 15 puntos, si Suarez mitampo og 14 puntos, samtang si Go miamot og 13 puntos.  (BANAT SPORTS)