Mandaue, Team Cebu nakasulod sa semis
CEBU, Philippines - Segurado na sa duha ka bronze ang defending champion Mandaue City human ang duha nila ka boksidor ang midaog sa quarterfinal round sa 2012 PLDT-ABAP Visayas Amateur Boxing Tournament kagahapon didto sa Robinson's Mall sa Dumaguete City.
Ang youth flyweight nga si Kevin Jake Catajara ug si Polid Banal midaog sa tagsa-tagsa nila ka mga away aron moabante sa semifinal round.
Ang gold medalist sa miaging tuig nga si Catajara midaog sa puntos batok ni JR Alabado sa Bago City, samtang si Banal mikulata ni Daniel Folio sa ABANO A.
Sila si Catajara ug Banal pulos moharong sunod batok sa mga boksidor gikan sa Negros Oriental.
Sa laing bahin, ang Team Cebu City nakaangkon usab og luna sa semifinals dihang midaog silang Junrel Jimenez ug Steven Noblefranca.
Gipaundang ni Jimenez si Richie Sumabog sa Tagbilaran, samtang gibukbok ni Noblefranca si Joshua Sambajon sa Northern Samar.
Ang Team Cebu aduna nay usa ka gold medal human si Jerry Castroverde mao lang ang bugtong boksidor nga miapil sa 54 kgs. class. (BANAT SPORTS)
- Latest
- Trending
