SHS-AdC Magis Eagles nagmangtas

CEBU, Philippines - Nagmangtas ang Sacred Heart School-Ateneo de Cebu (SHS-AdC) Magis Eagles sa second half aron papason ang ilang 12 puntos ug ingon man pagbihag sa Cebu Eastern College (CEC) Dragons, 78-59 sa Seaoil National Basketball Training Center (NBTC) Elite League didto sa City Sports Club-Cebu sa Cebu Business Park.

Sa sayo pa, ang   University of San Carlos (USC) South Campus Baby Warriors midaog batok sa Don Bosco Technology Center (DBTC) Greywolves, 67-59.

Biya unta ang Magis Eagles og 12 puntos sa halftime, 38-26, apan ilang gipakusgan ang duwa atol sa third quarter ug padayon kini nilang gikontrolar hangtod sa fourth period.

Ang Magis Eagles nagsolo karon sa liderato sa Group-B sa ilang 4-0 nga baraha, samtang ang Dragons adunay 3-1 win-loss record.

Si Julius Cadavis maoy nangu sa Magis Eagles sa iyang 13 puntos, samtang si James Neil Sumayang mao sab ang nangulo sa pilderong Dragons sa iyang 26 puntos. (BANAT NEWS)