Madayon kaha?
Daghang naintriga sa pagpanawag ni Floyd Mayweather Jr. ngadto ni Manny Pacquiao sa miaging adlaw nga ang tuyo daw mao ang paghitsas sa planong "superfight" nilang duha karong Mayo.
Karon naghinamhinam na ang kalibotan sa maong sangka. Sa nanggawas nga mga balita, walay pagsupak si Pacquiao pag-atubang kang Mayweather nianang bulana. Samtang si Mayweather aduna gyu'y petsang gipangayo, ang Mayo 5. Si Mayweather gitakdang ipaslak sa prisohan karong Hunyo 1 tungod sa pagka-kombikto niini sa pagkulata sa iyang kapuyo kaniadto.
Ambot nganong giinsister gyud ni Mayweather kining petsaha (Mayo 5) nga layo pa man unta ang iyang pakig-date sa mga priso sa prisohan. Duna man guy migawas nga report nga ang promoter ni Pacquiao nga si Bob Arum dili daw uyon nga sa maong petsa kini buhaton kay buot niining sa hinapos nga bahin sa Mayo o ba kaha sa Nobiyembre.
Naglibog ko, si Arum man unta maoy pirmeng nangusog nga mahitabo kining nga sangka, karon siya naman pud hinuon ang gustong malangay pa. Ang rason daw niining walay paglubad nga promoter mao nga gamay ra kaayo ang binyu nga Las Vegas.
Gusto ni Arum nga adto sa mas lapad o mas daku nga stadium tungod kay nagtuo siyang maglunop gyud sa mga boxing fans ang maong sangka. Gani miabot pa sa sugyot niini nga magtukod og dinaliang lapad nga binyu kun gikinahanglan, nganong dili nalang kaha siya magpatukod diha sa disyerto sa Las Vegas no?
Kung dakung kita maoy giapas ni Arum, nasayop diay siya sa iyang pagpangandam. Sa ato pa, dihang gisegihan niya og duso nga abuton ang duha sa nanglabay’ng mga bulan wala pa siya'y klarong desisyon kun asa ang binyu.
Dunay sayon nga pamaagi ay, maypa doblehon o ba kaha traypulon niya ang presyo sa tiket sa maong megafight, doblehon ang singil sa pay-per-view ug palapdan pa sa iyang mga sakop ang promosyon ug uban pang pamaagi aron masiguro ang 50 milyones dolyares nga iyang giapas. Sus, nganong libuglibogon pa man uy!
Ang nakaparat pud aning Mayweather, dili siya gustong 50-50 split o tunga sila ni Pacquiao sa maong sangka. Pagkahambogero nalang gyud niya uy! Sumala pa sa nanggawas nga report nga giingnan ni Mayweather si Pacquiao sa telepono nga siya (Floyd) maoy magdiktar sa bahinay. Wala siya kuyapi!
Nakaako pa siya sa pag-ingon kang Pacquiao nga kun mosugot daw kini sa maong away (bisan dili 50-50), madawat ang labing daku nga kuwarta sa tibuok boxing career sa Pambansang Kamao. Wow! Pagkabaga gud og kubal ani ni Mayweather!
Daw giisip niyang (Floyd) ‘pribelihiyo’ o swerte na alang sa usa ka boksidor ang makaatbang sa ring ang usa ka Floyd Mayweather Jr.? Nakalimot man siguro ni si Mayweather nga si Pacquiao maoy labing halinong boksidor sa kalibotan karon ug dili lang siya. Ngano kun ang atubangon ni Floyd laing boksidor mokita kaha siya sa susamang kitaon unya kun silang duha ni Pacquiao maoy magpinaksitay? Una nang ‘nagsabot’ ang duha ka kampo pipila ka bulan na ang nakalabay apan tungod sa kondisyones ni Floyd nga matang sa drug testing wala kini mahinayon.
Ang ako lang dakung pangutana mao ni, madayon kaha?
* * *
PAHIBALO: Ang Alpha Sigma Omega International Service Fraternity and Sorority, Grand SIOUX Alumni Council National Board magtigom karong adlawa diha sa barangay Lahug. Importanteng isyu ang tukion sa maong miting.
PAGTULON-AN: Ayaw kahadlok mapakyas, mas kahadloki ang kasinatiang dili nimo maagian kun dili ka mosuway.
- Latest
- Trending
