PAJO, USPF sud semis sa Shakey's volleyball

Mortal nga karibal Pajo National

CEBU, Philippines - High School (PNHS) ug University of Southern Philippines Foundation (USPF) miabante ngadto sa semifinal round sa 9th Shakey's Girls Volleyball League Cebu eliminations kagahapon didto sa Aznar Coliseum.

Ang mipasilong sa semis nga walay pilde, ang defending champion PNHS maoy nag-una sa bracket A bitbit ang 5-0 nga baraha, samtang ang USPF   nagtangag og 4-0 sa bracket B.

Ang PNHS ni Fr. Rey Manayon mipaluhod   sa Sacred Heart School (SHS)-Hijas de Jesus, 25-4, 25-2 luyo sa mainitong duwa nilang Gretchel Soltones, Lovely Marie Murillo, Denice Francesca Lim, June Mae Ares ug Mariel Gornez.

Sa ilang bahin, ang USPF mipakgang sa nagkutay nga daog sa Mandaue City Comprehensive National High School (MCCNHS) dihang ilang gipilde ang naulahi sud sa straight sets, 25-18, 25-15 kortesiya nilang Jacquelene Tadatada, Rose Marie Malagar, Dianne Padillo, Stephanie Alquitela, Sheena Abegail Quino ug Danielle Panangin.

Bisan pa sa ilang kapildihan, ang MCCNHS moabante gihapon sa semis uban ang 3-1 nga baraha.

Misulod sab sa semis ang Cebu City Olympics first runner-up St. Theresa's College (STC), kinsa adunay 4-1 win-loss record.

Sa ilang final elimination round, ang STC mibuntog sa Don Gerardo Ouano Memorial National High School (DGOMNHS), 25-18, 25-19 pinaagi sa makalilisang nga ataki nilang Angelica Dela Cruz, Pauline Ogapong, Megan Fadriga, Paula Maninang, Nedel Mausisa ug Julia Garcia.

Sa laing duwa, ang Southwestern University (SWU) nakalingkawas sa DGOMNHS sa usa ka non-bearing game, 25-23,

25-22.

Ang semifinal match himuon karong buntag diin ang PNHS makigbatok sa MCCNHS ug ang USPF makigsangka sa STC.

Ang modaog maoy mag-abot sa kampiyonato inig ka hapon. Ang kampiyon makakuha og katungod nga morepresentar sa Sugbu sa Shakey's G-League National Finals unya sa Marso 22-24 sunod tuig didto sa Davao City.  (BANAT SPORTS)